KƏND TƏSƏRRÜFATI MƏHSULLARININ İXRACI İLDƏN-İLƏ ARTIR
Kənd Təsərrüfatı Nazirliyindən AZƏRTAC-a bildirmişlər ki, respublikada istehsal olunmuş tərəvəz və bostan məhsulları ölkə əhalisinin tələbatını 2 dəfə ödədiyi üçün onların ixracı da ildən-ilə artır.
2006-cı ildə 20,5 milyon ABŞ dolları dəyərində 43,9 min ton tərəvəz, 129,7 milyon dollarlıq 887 ton bostan məhsulları ixrac edilmişdir. Keçmiş SSRİ dövründə Azərbaycanda ən çox kartof 1985-ci ildə (220 min ton) istehsal olunmuşdur. O dövrdə Azərbaycan əhalisinin kartofa olan tələbatı Polşa, Rusiya, Belarus və Baltikyanı respublikalardan gətirilən məhsul hesabına ödənilirdi.
Müstəqillik əldə edildikdən sonra bu sahəyə olan münasibət də dəyişmişdir. Kartof toxumçuluğunun yaxşılaşdırılması, hektarın məhsuldarlığının yüksəldilməsi hesabına son 2-3 ildə bir qayda olaraq bir milyon tona yaxın kartof istehsal olunur. Azərbaycan artıq kartof idxalçısından onu ixrac edən ölkəyə çevrilmişdir.
Ölkəmizdə istehsal olunan kənd təsərrüfatı məhsullarının xaricdə əsas bazarları Rusiya, Gürcüstan, Ukrayna və qismən də Belarusdadır. Bu bazarlara faraş tərəvəz, meyvə, tərəvəz konservləri, meyvə şirələri, üzüm şərabları, pambıq mahlıcı, tütün məmulatları, qoz və fındıq göndərilir.
Bölmənin digər xəbərləri
