KƏNDDƏ YENİ SUTƏMİZLƏYİCİ QURĞU İSTİFADƏYƏ VERİLMİŞDİR
AZƏRTAC xəbər verir ki, Saatlı rayonunun Qıraqlı kəndində müasir texnologiya əsasında İtaliya, ABŞ, Almaniya və Belçika istehsalı olan avadanlıqla təchiz olunmuş növbəti sutəmizləyici qurğu istifadəyə verilmişdir.
Ekologiya və Təbii Sərvətlər Nazirliyindən AZƏRTAC-a bildirmişlər ki, kəndin 3357 nəfər əhalisi 14 bulaq vasitəsilə gün ərzində 70 kubmetr sutəmizləmə gücünə malik modul tipli qurğunun təmizlədiyi içməli sudan istifadə edəcəkdir.
Xatırladaq ki, təkcə ötən il Yevlax, Zərdab, Kürdəmir, İmişli, Sabirabad, Saatlı, Salyan və Neftçala rayonlarının 50 yaşayış məntəqəsinin 55 mindən çox sakini də təmiz içməli su ilə təmin olunmuşdur.
Hazırda daha 12 rayonun 50 yaşayış məntəqəsinin keyfiyyətli su ilə təmin edilməsi istiqamətində işlər davam etdirilir.
Bölmənin digər xəbərləri
