KENNEDİNİN QƏTLİ BARƏDƏ YENİ MƏRUZƏ AÇIQLANMIŞDIR
“ABŞ hökuməti Con Fitscerald Kennedinin qətlinin təfərrüatını gizlədirdimi?” adlı məruzənin təqdimatı Vaşinqtondakı “Willard” hotelində olmuşdur. Amerika mütəxəssisləri Pol Kunsler, Duqlas Horn, Ceyms Fettser, Devid Mantika, Tomas Lipskomb, Coan Mellen indiyədək mövcud olan bütün məlumatları bir yerə toplayaraq yenidən təhlil etmişlər. Onların fikrincə, ABŞ hökuməti bu qətlin təhqiqinin nəinki ört-basdır edilməsinə, hətta dəlillərin açıqdan-açığa saxtalaşdırılmasına və təhrifinə hər vasitə ilə çalışmışdır.
ABŞ-ın 35-ci Prezidenti C.F.Kennedi 1963-cü il noyabrın 22-də Dallasda öldürülmüşdür. Cinayətdən dərhal sonra yaradılmış Uorren hökumət komissiyası belə qənaətə gəlmişdir ki, qətl hadisəsi Li Harvi Osvald adlı qatilin əməlidir və söhbət genişmiqyaslı sui-qəsddən getmir. Lakin ABŞ-da rəsmi versiyanı heç də hamı qəbul etmədi. Prezidentin avtomobil karvanı gedə-gedə ona altı saniyə ərzində iki dəqiq atəş açaraq, tüfəngi ani sürətlə dolduran snayperin qeyri-adi məharəti ilk anda şübhə doğurmuşdu.
Tarixçi Ceyms Fettserin sözlərinə görə, ekspertlərin topladıqları məlumat göstərir ki, Uorren komissiyasının rəyinin əksinə olaraq, bir yerdən deyil, müxtəlif nöqtələrdən üç əvəzinə altı atəş açılmışdır.
Oxşar fərziyyələr dəfələrlə irəli sürülmüşdür. Söhbət onların nə dərəcədə inandırıcı olmasından gedir. Radiasiya onkologiyası sahəsində mütəxəssis Devid Mantik optik densitometriyanın köməyi ilə Kennedinin qafa tasının üç rentgen şəklində texniki ekspertiza aparmışdır. Prezidentin qətlindən dərhal sonra çəkilmiş həmin şəkillər ABŞ Milli Arxivində saxlanılırdı. Aşkara çıxarılan ilk fakt böyük heyrət doğurmuşdur. Məlum olmuşdur ki, rentgen şəkillərinin hər üçü surətdir, əsilləri isə yoxa çıxmışdır. Bundan əlavə, surətlərin üzərində kimsə əməlli-başlı işləmişdir.
Mütəxəssislərin fikrincə, şəkillər yalnız bir məqsədlə - Con Kennedinin aldığı yaraların əsil mahiyyətini gizlətmək üçün saxtalaşdırıla bilərdi. Mütəxəssis həmin məlumata istinadla bildirir ki, Kennedinin başına bir deyil, iki güllə dəymişdir.
Şübhəsiz, ekspertlərin bu məlumatı sui-qəsd versiyası tərəfdarlarını daha da inandıracaqdır. İctimai rəy sorğusu göstərir ki, amerikalıların əksəriyyəti bu fikirdədir. Lakin belə təqdimatlardan sonra həmişə qarşıya təbii bir sual çıxır: Kennedinin ölümü kimə sərfəli idi və sui-qəsdin təşkilatçısı kimdir?
Ceyms Fettserin fikrincə, sui-qəsdin əsas təşkilatçısı Lindon Consondur. Ekspertin dediyinə görə, o, hakimiyyətə can atan ağılsız adam idi. Ekspert demişdir: “Niksonun sui-qəsdə cəlb olunması ideyası həqiqətə daha çox uyğundur. Son prezident seçkilərini cüzi fərqlə uduzan adam yaxın gələcəkdə dövlət başçısı seçilə bilərdi. Bu, Uorren komissiyasının rəsmi rəyinə Niksonun hakimiyyəti illərində yenidən baxılmayacağı barədə Consona müəyyən təminat verirdi. Zənnimcə, Robert Kennedinin də qətlə yetirilməsinin səbəblərindən biri bu idi ki, o, qardaşının ölümü ilə bağlı yeni araşdırma aparmaq niyyətini açıqlamışdı”.
Bölmənin digər xəbərləri
