KƏPƏNƏKÇİDƏ NOVRUZ VƏ POEZİYA BAYRAMI
Əslən Gürcüstanın Bolnisi rayonunun Kəpənəkçi kəndindən olan şair Kamandar Eyvazlının ömrünün 40-cı baharı Novruz bayramına təsadüf etmişdir. Bununla əlaqədar onun doğma kəndində, vaxtilə oxuduğu orta məktəbdə yubiley tədbiri və Bakıda bu yaxınlarda çapdan çıxan “Möhlət ver, ürəyim” şerlər kitabının təqdimat mərasimi keçirilmişdir.
Tədbirin əvvəlində Azərbaycan Yazıçılar və Jurnalistlər birliklərinin göndərdiyi təbrik teleqramları oxundu. Sonra yazıçı Nahid Hacızadə, şair İlyas Tapdıq və kitabın redaktoru Musa Ələkbərli çıxış edərək, öz dəst-xətti ilə seçilən Kamandar Eyvazlının yaradıcılığından danışdılar, şairin aşıq Əmrah, aşıq Hüseyn Saraclı, aşıq Kamandar kimi qüdrətli söz və saz ustadların şerlərindən ilham aldığını vurğuladılar. Məktəbin müəllimləri öz keçmiş şagirdi ilə fəxr etdiklərini bildirdilər və ona yeni-yeni yaradıcılıq uğurları arzuladılar.
Bolnisi, Marneuli və Dmanisi rayın icra hakimiyyətlərinin nümayəndələri gürcü və Azərbaycan xalqları arasında dostluğun daha da möhkəmlənməsində Kamandar Eyvazlı kimi ziyalıların da xidməti olduğunu vurğuladılar, şerlərində doğma yurdu Borçalını ilhamla tərənnüm etdiyini söylədilər.
Sonda el sənətkarları aşıq havaları üstündə şairin şerlərini ifa etdilər.
Şahismayıl Məmmədov
AZƏRTAC-ın xüsusi müxbiri
Bolnisi rayonu, Kəpənəkçi kəndi
Bölmənin digər xəbərləri
