“KƏŞFİYYAT VƏ ƏKS-KƏŞFİYYAT HAQQINDA” QANUN LAYİHƏSİ İKİNCİ OXUNUŞDA QƏBUL OLUNMUŞDUR
AZƏRTAC xəbər verir ki, iclasda “Kəşfiyyat və əks-kəşfiyyat haqqında” qanun layihəsi ikinci oxunuşda müzakirə edilmişdir. Milli Məclis sədrinin müavini, təhlükəsizlik və müdafiə məsələləri daimi komissiyanın sədri Ziyafət Əsgərov demişdir ki, layihənin parlamentdə birinci oxunuş müzakirəsi zamanı deputatların irəli sürdükləri rəy və təkliflər öyrənilmiş və bəziləri nəzərə alınmışdır. Məsələn, əks-kəşfiyyat fəaliyyəti subyektlərinin hüquqları ilə bağlı 8-ci maddəyə yeni bənd əlavə olunmuşdur. Bundan başqa, kəşfiyyat və əks-kəşfiyyat fəaliyyəti subyektlərinin sosial müdafiəsi ilə bağlı maddə genişləndirilmişdir. Bu maddəyə edilən əlavələrdə kəşfiyyat və əks–kəşfiyyat fəaliyyəti subyektlərinə dövlət qayğısının artırılması, onların sosial müdafiəsi, yüksək əmək haqqı ilə təmin olunmaları və digər müddəalar öz əksini tapmışdır.
Qanun layihəsi əsas kimi qəbul olunduqdan sonra fəsil-fəsil müzakirə edilmişdir. Deputatlar, Milli Təhlükəsizlik, Müdafiə nazirliklərinin və digər əlaqədar təşkilatların nümayəndələri layihə ilə bağlı öz tövsiyələrini vermişlər.
Sonda qanun layihəsi bütövlükdə səsə qoyulmuş ikinci oxunuşda qəbul olunmuşdur.
Bölmənin digər xəbərləri
