Kiçik kənddən böyük arzulara: Ruhinin arzuları və uğurları
Bakı, 28 avqust AZƏRTAC
Balaca bir kənddə dünyaya göz açan Ruhinin uğuru göstərir ki, böyük arzular üçün böyük şəhərdə doğulmaq deyil, böyük məqsədlərə inanmaq və əzmlə çalışmaq lazımdır.
Qazax rayon Bala Çaylı kənd tam orta məktəbinin məzunu Ruhin Xasməmmədov AZƏRTAC-a uğur hekayəsi haqqında danışıb.
“Həyatımda təhsillə yanaşı, xüsusi yer tutan bir sahə də var – rəssamlıq. Rəsm mənim üçün sadəcə bir hobbi deyil, ən çox sevdiyim sənətdir. Kiçik yaşlarımdan bu sənətlə məşğulam. Rəsmə marağım uşaqlıq illərimdən başlayıb. Yaşadığımız ərazidə professional rəssam olan bir qonşumuz var idi. Onun çəkdiyi rəsmlər məndə böyük maraq oyadırdı. Saatlarla onun əsərlərinə baxır, çəkdiklərini təkrarlamağa və özümü ona oxşatmağa çalışırdım. Həmin vaxtlar rəssamlığın gələcəkdə həyatımın bu qədər mühüm hissəsinə çevriləcəyini düşünmürdüm. Sonralar tanınmış rəssam Nəciməddin Hüseynovun yaradıcılığı ilə tanış oldum. Onun əsərləri də mənə böyük təsir göstərdi. Yavaş-yavaş özüm də rəsm çəkmək qabiliyyətimin olduğunu hiss etməyə başladım. Bu marağımı daha da inkişaf etdirmək üçün Qazax Dövlət Rəsm Qalereyasının kurslarına qatıldım. Orada rəsmə olan sevgim daha da möhkəmləndi və öz üzərimdə ciddi çalışmağa başladım.
2019-cu ildən etibarən rəssamlıqla daha ardıcıl şəkildə məşğul oluram. Bu illər ərzində dəfələrlə respublika səviyyəli rəsm müsabiqələrində iştirak etmiş, müxtəlif yerlərə layiq görülmüş və fərqlənmişəm. Hər bir müsabiqə mənim üçün yalnız qalib gəlmək deyil, həm də yeni insanlar tanımaq, təcrübə qazanmaq və özümü sınamaq baxımından əhəmiyyətli olub. Yaradıcılığımda xüsusi bir mərhələ isə 2021–2022-ci illərə təsadüf edir. Həmin dövrdə şəhidlərimizin və milli qəhrəmanlarımızın portretlərini çəkməyə başladım. Onların həyat yolu və göstərdikləri qəhrəmanlıq məndə böyük duyğular yaradırdı. İstəyirdim ki, öz sənətimlə onların xatirəsinə töhfə verim. Çəkdiyim portretlərdən biri rayon rəhbərliyinin diqqətini çəkdi. Bundan sonra çəkdiyim şəhid və qəhrəman portretlərinin şəhid ailələrinə çatdırılmasına kömək göstərildi. Mənim üçün bu, qazandığım mükafatlardan daha fərqli və daha dəyərli bir hiss idi. Çünki çəkdiyim rəsmlərin şəhid ailələrinə çatması və onların xatirəsinə həsr olunması mənə böyük mənəvi qürur verdi”, - deyə o bildirib.
Ruhin beynəlxalq səviyyədə də özünü sınayıb. Ukraynada keçirilən beynəlxalq uşaq rəsm müsabiqəsində fərqlənən ilk 20 iştirakçı arasında yer alıb. Bu barədə deyir: “Təəssüf ki, həmin dövrdə baş verən müharibə səbəbindən diplom və mükafatlandırma mərasimi təxirə düşüb. Buna baxmayaraq, belə bir müsabiqədə ölkəmi və rayonumu təmsil etmək mənim üçün böyük təcrübə və qürur olub. Bu gün artıq qarşıda məni yeni bir mərhələ gözləyir. Azərbaycan Texniki Universitetinə qəbul olmağım mənim üçün böyük uğurdur. Beynəlxalq ticarət və logistika ixtisasını seçsəm də, rəssamlıqdan heç vaxt uzaqlaşmaq fikrim yoxdur. Çünki insanın seçdiyi peşə ilə sevdiyi sənət hər zaman eyni olmaya bilər. Mən gələcəkdə başqa sahədə çalışsam belə, rəssamlıq mənim ən sevdiyim sənət olaraq qalacaq. Rəsm çəkəndə özümü daha rahat və azad hiss edirəm. Mənim üçün rənglər bəzən sözlərin ifadə edə bilmədiyi duyğuları danışır”.
Ruhin məqsədlərindən də danışıb: “Həm universitetdə yaxşı təhsil almaq, həm də rəssamlıq sahəsində özümü inkişaf etdirmək istəyirəm. Qarşıda yeni əsərlər yaratmaq, müxtəlif sərgilərdə və müsabiqələrdə iştirak etmək, öz yaradıcılığımı daha geniş auditoriyaya çatdırmaq əsas hədəflərimdəndir. Geriyə baxanda anlayıram ki, hər şey bir qonşumuzun çəkdiyi rəsmlərə olan uşaqlıq marağımdan başladı. Sonra bu maraq sevgiyə, sevgi isə zəhmətə çevrildi. Məncə, uğurun ən vacib şərtlərindən biri insanın sevdiyi işdən, qarşısına qoyduğu məqsəddən vaz keçməməsidir. İnanıram ki, insan özünə güvəndikdə, məqsədi uğrunda əzmlə çalışdıqda qarşısındakı çətinlikləri dəf edə və arzularına çata bilər.
Mənim uğur hekayəm isə hələ bitməyib. Universitetə qəbul olmağım və qazandığım uğurlar mənim üçün son deyil, yeni başlanğıcdır. İnanıram ki, qarşıda həm təhsil, həm də rəssamlıq sahəsində məni daha böyük uğurlar gözləyir”.
Müxbir -Tünzalə Arazlı
Bölmənin digər xəbərləri
