KİNEMATOQRAFÇILAR İTTİFAQINDA MƏTBUAT KONFRANSI KEÇİRİLMİŞDİR
Mədəniyyət və Turizm Nazirliyinin kino işləri şöbəsinin müdiri vəzifəsini icra edən Cəmil Fərəcov filmin istehsalının başa çatması münasibətilə onun yaradıcı kollektivini təbrik etmişdir. Yeni ekran əsərinin quruluşçu rejissoru Ramiz Əzizbəyli filmin yaradıcı heyətini kütləvi informasiya vasitələri nümayəndələrinə təqdim edərək, çəkiliş prosesindən danışmışdır. Bildirmişdir ki, filmdə çəkilmək üçün, əsasən, Azərbaycan Dövlət Mədəniyyət və İncəsənət Universitetinin müəllimləri dəvət olunmuşlar. Filmdə onlardan ikisi - Vidadi Həsənov və Gülşad Baxşıyeva baş rollara çəkilmişlər.
Vətənpərvərlik mövzusunda lentə alınmış filmdə Qarabağ müharibəsində şəhid vermiş bir ailənin əzab və iztirabları, ağır psixoloji sarsıntıları ön plana çəkilmişdir. Böyük oğlunun ölüm xəbərini anasından gizlədən ata kiçik oğlunu da vətənin müdafiəsinə ruhlandırır.
Filmin ssenari müəllifi Orxan Fikrətoğlu, operatoru Amin Novruzov, rəssamı Nizami Bəydəmirov, bəstəkarı Aydın Əzim Kərimoğludur.
Yeni ekran əsərinin ilk təqdimatı yaxın günlərdə olacaqdır.
Konfransda jurnalistlərin sualları cavablandırılmışdır.
Bölmənin digər xəbərləri
