Kiyev yaxın zamanlarda ABŞ-ın Ukraynaya ATACMS raketləri verəcəyini iddia edir
Bakı, 16 sentyabr, AZƏRTAC
Ukrayna ATACMS raketlərinin tədarükü ilə bağlı danışıqlar aparır və yaxın vaxtlarda bu silahlar Kiyevə veriləcək.
AZƏRTAC xəbər verir ki, bu barədə Ukrayna Xarici İşlər Nazirliyinin mətbuat katibi Oleq Nikolenko İtaliyanın “Corriere della Sera” qəzetinə müsahibəsində deyib.
Onun sözlərinə görə, Prezident Volodimir Zelenski gələn həftə ABŞ-a səfəri zamanı Ukraynaya hərbi yardım və ərzaq təhlükəsizliyi məsələlərini müzakirə edəcək.
Oleq Nikolenko, həmçinin yaxın zamanlarda Volodimir Zelenski ilə Türkiyə Prezidenti Rəcəb Tayyib Ərdoğan arasında “taxıl sazişi”nə dair yeni danışıqların baş tutacağını istisna etməyib.
Bir müddət əvvəl ABŞ-ın hakimiyyət orqanları Prezident Cozef Baydenin sentyabrın 21-də Vaşinqtonda Volodimir Zelenski ilə danışıqlar aparacağını elan edib. Ağ evin məlumatına görə, Ukrayna Prezidenti, eyni zamanda, Konqresdə demokratların və respublikaçıların liderləri ilə görüşmək istəyir.
Qeyd edək ki, HIMARS raket sistemi vasitəsilə buraxıla bilən ATACMS raketləri 300 kilometrə qədər uçuş məsafəsinə malikdir.
Bölmənin digər xəbərləri
