Kommersiya mübahisələrinin xüsusiyyətləri və aktual məsələləri müzakirə edilib
Bakı, 13 fevral, AZƏRTAC
Ali Məhkəmənin Kommersiya Kollegiyasının və Bakı Apellyasiya Məhkəməsinin hakimlərinin, Vəkillər Kollegiyasının üzvlərinin və biznes strukturlarının nümayəndələrinin iştirakı ilə kommersiya mübahisələrinin xüsusiyyətlərinə və aktual məsələlərinə həsr olunmuş seminar - dəyirmi masa təşkil edilib. Tədbir Bakı Kommersiya Məhkəməsinin və Vəkillər Kollegiyasının Biznes Hüququ Komitəsinin birgə təşkilatçılığı ilə keçirilib.
Vəkillər Kollegiyasının mətbuat xidmətindən AZƏRTAC-a verilən məlumata görə, tədbiri giriş sözü ilə açan Bakı Kommersiya Məhkəməsinin sədri İlham Əhmədov kommersiya mübahisələri ilə bağlı praktiki və nəzəri hüquqi məsələlərin ətraflı müzakirəsi və təcrübə mübadiləsinin əhəmiyyətini qeyd edib. Sonra o, çirkli pulların yuyulmasının qarşısının alınması məqsədilə diqqət yetirilməli olan maddi hüquq məsələlərinə, o cümlədən hüquqi şəxslərin yenidən təşkili zamanı hüquqi varisliyin xüsusiyyətləri, universal və xüsusi hüquq qabiliyyətinin fərqləndirilməsinin zəruriliyi, sübutetmə vəzifəsinin yerinə yetirilməsi üçün tələb olunan addımlar, korporativ mübahisələr zamanı məhkəmə baxışının hədləri, sadələşdirilmiş icraat və bir sıra digər məsələlər barədə məhkəmənin formalaşmış praktikası barədə geniş məlumat verib və diqqət yetirilməli olan məqamları vurğulayıb.
Ali Məhkəmənin Kommersiya Kollegiyasının sədri Kəmalə Abiyeva qeyd edilən məsələlərlə bağlı məhkəmə təcrübəsinin ümumiləşdirilməsi istiqamətində apardığı işlər, habelə məhkəmə aidiyyəti, müvəqqəti təminat tədbirləri, sübutların qiymətləndirilməsi və bir sıra digər maddi və prosessual hüquq məsələlərinin xüsusiyyətləri ilə bağlı Ali Məhkəmənin formalaşmış mövqeyi barədə ətraflı məlumat verib.
Vəkillər Kollegiyasının Biznes Hüququ Komitəsinin sədri Nazlı Əhmədova tədbirə ev sahibliyi edən Bakı Kommersiya Məhkəməsinə, tədbiri dəstəkləmiş Ali Məhkəmənin Kommersiya Kollegiyasına və Bakı Apellyasiya Məhkəməsinə Vəkillər Kollegiyası adından minnətdarlığını bildirərək, bu cür dialoqun vəkillər tərəfindən yüksək qiymətləndirildiyini, ədalət mühakiməsinin inkişafı və səmərəli təcrübə mübadiləsinin genişləndirilməsi üçün daimi platformaya çevriləcəyinə ümidini ifadə edib.
Ali Məhkəmənin Kommersiya Kollegiyasının hakimi Bəhman Qəribov və Apellyasiya Məhkəməsinin hakimi Leyla Əliyeva mövzu ilə bağlı məhkəmə təcrübəsi barədə məlumat veriblər. Vəkillər Kollegiyasının üzvləri Əkrəm Həsənov, Cavid Alıyev, Dünyamin Novruzov, Sevda Məhərrəmova, Şaiq Mirzəyev, Rüfət Bədirli və Əlibaba Əliyevin qeyd etdikləri praktiki məsələlər ətrafında ətraflı fikir mübadiləsi aparılıb.
Bölmənin digər xəbərləri
