KONSTİTUSİYA MƏHKƏMƏSİNDƏ ÇİN HÜQUQ CƏMİYYƏTİNİN NÜMAYƏNDƏ HEYƏTİ İLƏ GÖRÜŞ OLMUŞDUR
Azərbaycan Respublikasının Konstitusiya Məhkəməsi və məhkəmə-hüquq sistemi haqqında qonaqlara ətraflı məlumat verən F.Abdullayev, ölkəmizin Çin Xalq Respublikası ilə hüquqi sahədə əməkdaşlığını yüksək qiymətləndirmiş, ölkələrimiz arasında əlaqələrin daha da inkişaf etdirilməsinin vacibliyini qeyd etmişdir. Bildirmişdir ki, məhkəmə-hüquq sistemində mütəmadi təcrübə mübadiləsinin aparılması hər iki tərəf üçün faydalı olardı.
Çin Hüquq Cəmiyyəti nümayəndə heyətinin rəhbəri, bu qurumun baş katibinin müavini Qu Jaomin təmsil etdiyi təşkilatın fəaliyyətindən danışmış, F.Abdullayevi bu ilin avqust ayında Urumçi şəhərində MDB ölkələrinin konstitusiya məhkəmələri rəhbərlərinin iştirakı ilə keçiriləcək konfransa dəvət etmişdir. Qonaq demişdir ki, Çin Hüquq Cəmiyyəti tərəfindən təşkil olunacaq konfransda konstitusiya ədalət mühakiməsi sahəsində iştirakçı ölkələrin təcrübəsi öyrəniləcək, məhkəmə-hüquq işinə dair bir sıra aktual məsələlər müzakirə ediləcəkdir.
Dəvətə görə təşəkkür edən F.Abdullayev, Çin Hüquq Cəmiyyəti ilə əlaqələrin inkişafından məmnunluğunu bildirmiş, əməkdaşlığın daha da genişləndirilməsi yollarından danışmışdır.
Görüşdən sonra qonaqlar Konstitusiya Məhkəməsinin binasını gəzmiş, hakimlərin və əməkdaşların iş şəraiti ilə tanış olmuşlar.
Bölmənin digər xəbərləri
