Könül Nurullayeva: Tarixi Zəfərimizin bəxş etdiyi əminlik idmançılarımıza əlavə güc və stimul verir
Bakı, 19 mart, AZƏRTAC
Ölkəmizdə həyata keçirilən uğurlu idman siyasəti bu sahədə intensiv nailiyyətlər qazanmağa imkan verib. Prezident İlham Əliyevin çempion güləşçilərimizlə görüş zamanı söylədiyi kimi, idman hər bir ölkənin qüdrətini əks etdirir. Çünki əgər beynəlxalq yarışlarda, Olimpiya Oyunlarında ölkələrin reytinqlərinə nəzər salsaq görərik ki, adətən inkişaf etmiş ölkələrin nümayəndələri daha da böyük uğurlar qazanırlar. Bu mənada Azərbaycanın idman dövləti kimi beynəlxalq nüfuzu getdikcə daha da artır.
Ümumiyyətlə, idman sahəsində uğuru şərtləndirən bir neçə amil var. Onlardan da ən vacibi dövlətimizin başçısının idmana və idmançılara göstərdiyi qayğıdır. Bu gün idmanın bütün növləri üzrə istedadlı gənclər yetişməkdədir. Hazırda dünyada həm də idman sahəsində mövcud olan rəqabət mühitində Azərbaycan idmançıları çox fərqlənirlər.
Bu fikirləri AZƏRTAC-a açıqlamasında Milli Məclisin Gənclər və idman komitəsinin üzvü Könül Nurullayeva söyləyib.
“Prezident İlham Əliyevin də söylədiyi kimi, beynəlxalq yarışlarda bizim idmançılarımız öz gücünü, eyni zamanda, dövlətimizin qüdrətini nümayiş etdirirlər.
Azərbaycan həm də beynəlxalq idman qurumlarının rəğbətini qazanıb. Uğurlu idman siyasəti, olimpiya ideallarının təbliği, idmanın maddi-texniki bazasının möhkəmləndirilməsi, müasir idman kompleksləri və digər tədbirlər nəticəsində ölkəmiz son illərdə mötəbər beynəlxalq idman yarışlarının keçirildiyi məkana çevrilib. Son onillikdə Bakıda və Azərbaycanın regionlarında ən nüfuzlu dünya və Avropa yarışları təşkil olunmaqdadır. Təsadüfi deyil ki, beynəlxalq idman təşkilatlarının rəhbərləri yarışlarda nümunəvi təşkilatçılığa görə Azərbaycanı nümunə kimi təqdim edirlər”, - deyə K.Nurullayeva vurğulayıb.
Onun sözlərinə görə, Prezident, Müzəffər Ali Baş Komandan İlham Əliyevin idmançılarla görüşündə ən önəmli məqamlardan biri də onların beynəlxalq yarışlarda qalib ölkənin təmsilçiləri kimi çıxış etmələrini vurğulamasıdır.
“Əlbəttə, idmançılarımız bütün yarışlarda bayrağımızı yüksəklərə qaldıraraq qələbə qazanmağı hədəfləyirdi. Lakin torpaqları işğal altında olan bir ölkəni təmsil etməyin psixoloji tərəflərini mütləq qeyd etməliyik. Hər bir idmançımız yarışlarda həm də dövlət olaraq gücümüzün, iradəmizin olduğunu sübut etməyə çalışırdı. Beynəlxalq idman arenalarında göstərdiyimiz gücü gec-tez döyüş meydanında da sərgiləmək hər bir Azərbaycan idmançısının arzusu idi. Bu gün artıq qalib ölkənin, müzəffər xalqın təmsilçisi kimi idman arenalarında çıxış edəndə dövlətimizin başçısının da söylədiyi kimi, idmançılarımız özlərini əmin hiss edirlər.
Tarixi Zəfərimizin bəxş etdiyi bu əminlik idmançılarımıza əlavə güc və stimul verir. İdmançılarımızın qarşısında duran əsas vəzifə isə dövlətimizin şöhrətini hər zaman yüksəklikdə saxlamaq, qalib Azərbaycanın nüfuzunu daha da möhkəmləndirməkdir”, - deyə Könül Nurullayeva vurğulayıb.
Bölmənin digər xəbərləri
