Koronavirusa qarşı vaksin 16 yaşdan yuxarı bütün amerikalılar üçün əlçatan olub
Bakı, 20 aprel, AZƏRTAC
ABŞ-da aprelin 19-dan etibarən koronavirus əleyhinə vaksin 16 yaşdan yuxarı bütün ölkə əhalisi üçün əlçatan olub.
AZƏRTAC xəbər verir ki, bu barədə ABŞ Prezidenti Cozef Bayden bazar ertəsi günü özünün “Twitter” səhifəsində bildirib. “Bu gündən etibarən ABŞ-da yaşayan 16 yaşdan yuxarı hər kəs vaksinasiya oluna bilər. Gedin və bunu edin”, - deyə ABŞ Prezident yazıb.
Bir qədər əvvəl Ağ ev administrasiyası mayın 1-dən etibarən vaksinin əhalinin xüsusi qruplarına deyil, hər kəs üçün əlçatan olacağını elan etmişdi. Lakin aprelin əvvəlində Cozef Bayden bu oriyentirin aprelin 19-na keçirildiyini bildirmişdi. Bu plan ABŞ-da COVID-19 əleyhinə vaksinasiya üçün yaş, səhhət və digər kateqoriyalar üzrə məhdudiyyətlərin aradan qaldırılması deməkdir.
Xatırladaq ki, 2020-ci ilin martında Ümumdünya Səhiyyə Təşkilatı yeni koronavirusun yayılmasını pandemiya elan edib. Pandemiyanın statistikasını aparan Worldometer saytının son məlumatına əsasən, ABŞ-da COVID-19 infeksiyasına yoluxanların sayı 32 milyon 475 mini ötüb, 581 min 542 nəfər isə həyatını itirib. Birləşmiş Ştatlar həm xəstəliyə yoluxanların, həm də ölənlərin sayına görə dünyada ilk pillədə qərarlaşıb.
Bölmənin digər xəbərləri
