Kosmosu fəth edən macarların siyahısına yeni adlar əlavə olunacaq
Budapeşt, 29 aprel, AZƏRTAC
May ayında “Axiom 4” (Ax-4) astronavt missiyasının orbitə buraxılması baş tuta bilər. Missiyanın tərkibində macar tədqiqatçı astronavt Tibor Kapu və onun ehtiyat üzvü Düla Çereneyi də yer alıb.
Bu barədə AZƏRTAC “index.hu” saytına istinadla xəbər verir.
Bildirilib ki, macar kosmos fatehləri NASA-nın hazırlıq proqramını uğurla başa vurublar.
Sosial şəbəkələrdə yayılan “Macarıstan orbitdə” (Hunor) proqramının məlumatında qeyd olunur ki, hazırlıq hələ keçən ilin avqust ayında Hyustonda yerləşən NASA-nın Conson Kosmik Mərkəzində başlayıb. “Ax-4” heyətinin üzvləri burada intensiv təlim və praktiki hazırlıq keçiblər. Astronavtlar müxtəlif əməliyyatları, fövqəladə vəziyyətləri məşq ediblər və beynəlxalq kosmik stansiyanın real modellərində elmi təcrübələr aparıblar.
Proqrama “Axiom Space” və “SpaceX training” tərəfindən təqdim olunan xüsusi modullar da əlavə edilib. Bu təlimlər zamanı heyət üzvləri diqqətlərinin əsasən “Dragon” kapsuluna yönəldiblər.
Keçən həftə “Ax-4” astronavtları hazırlığı başa vurublar və indi missiyanın başlanmasına hazırlaşırlar.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
