Kreml taxıl sazişinin uzadılması perspektivini spektik qiymətləndirir
Bakı, 12 aprel, AZƏRTAC
Taxıl müqaviləsinin uzadılmasının perspektivləri o qədər də yaxşı deyil.
AZƏRTAC İnterfaks agentliyinə istinadla xəbər verir ki, bu fikri Rusiya Prezidentinin mətbuat katibi Dmitri Peskov brifinqdə söyləyib.
"Saziş tam olaraq deyil, 60 gün uzadıldı. Səbəbi odur ki, müqavilənin tam yarısı işləməyib və indi də işləmir. Biz bilirik ki, BMT nümayəndələri müəyyən səylər göstərir, lakin buna nail ola bilmirlər. Sazişin ikinci yarısı (Rusiyaya aid hissəsi - red.) hələ də işləmir. Bu şərtlər yerinə yetirilmir", - deyə Kremlin sözçüsü bildirib.
Xatırladaq ki, taxıl sazişi 2022-ci il iyulun 22-də İstanbulda bağlanıb. O vaxt BMT, Rusiya, Türkiyə və Ukraynanın iştirakı ilə iki sənəd imzalanıb. Onlardan biri Ukrayna taxılının ixracı üçün dəhlizin yaradılması, digəri Rusiya ərzaq və gübrəsinin ixracı barədə idi. O vaxtdan bəri Moskva dəfələrlə bildirib ki, sövdələşmənin Rusiya hissəsi işləmir.
Bu il martın 18-də sazişin müddəti bitəndə BMT onun 120 gün uzadılmasını istəsə də, Rusiya müqaviləni 60 gün uzatmağa razılaşıb.
Bölmənin digər xəbərləri
