Kremldə Putinlə Tramp arasında danışıqların fevralın sonunadək baş tutacağını istisna etmirlər
Moskva, 19 fevral, AZƏRTAC
Prezidentlər Vladimir Putin və Donald Tramp arasında danışıqlar fevralın sonunadək baş tuta bilər.
AZƏRTAC xəbər verir ki, bu barədə Rusiya Federasiyası Prezidentinin mətbuat katibi Dmitri Peskov məlumat verib.
Peskov qeyd edib ki, hələlik görüşün konkret tarixi yoxdur, lakin bu məsələ danışıqlar prosesi çərçivəsində müzakirə olunur.
Onun sözlərinə görə, ABŞ-ın kimi təyin etməsindən asılı olaraq, Rusiya Ukrayna məsələsi üzrə öz müzakirəçisini təyin edəcək. Bu addım maraqlar tarazlığını təmin etmək və ölkələr arasında gələcək kommunikasiyaların qurulması məqsədi daşıyır.
Kremlin sözçüsü vurğulayıb ki, ABŞ və Rusiya Ukraynadakı münaqişənin sülh yolu ilə həlli istiqamətində çox mühüm addım atıb. O qeyd edib ki, Ər-Riyadda aparılan danışıqlar bütün tərəflər üçün məqbul həll yollarının tapılmasına yönəlmiş gələcək müzakirələrə zəmin yaradır.
“Bu proses vaxt, diplomatiya və qarşılıqlı anlaşma tələb edir. Konkret razılaşmalar barədə danışmaq hələ tezdir, lakin dialoqun başlanması faktı artıq mühüm nəticədir”, -deyə Peskov əlavə edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
