Sentyabrın 24-də Kürdəmir şəhərində Olimpiya İdman Kompleksinin açılışı olmuşdur.

Kompleksin qarşısına toplaşan rayon sakinləri, eləcə də Pekin Olimpiya oyunlarında ölkəmizi təmsil edən idmançılar Prezident İlham Əliyevi hərarətlə qarşıladılar.

Dövlətimizin başçısı rəmzi açılışı bildirən lenti kəsdi.

Komleksin təməli 2005-ci ilin oktyabrında, Prezidentin Kürdəmirə səfəri zamanı qoyulmuşdu. Burada respublika və beynəlxalq səviyyəli yarışların keçirilməsi üçün gözəl şərait yaradılmışdır. 5,5 hektar ərazidə yerləşən bu idman qurğusu həm də şəhərə xüsusi yaraşıq verir.

Prezident İlham Əliyev kompleksin ərazisini gəzdi, futbol, voleybol, basketbol meydançalarına, məşq otaqlarına, habelə ulu öndər Heydər Əliyevin ölkəmizdə idmanın inkişafına və idmançılara diqqət və qayğısından bəhs edən fotostendə baxdı. Sonra böyük idman salonunda yeniyetmələrdən ibarət mini futbol komandasının, gənc həndbolçuların oyunlarını izlədi, Pekin Olimpiadasının iştirakçıları ilə görüşdü.

Dövlətimizin başçısı Olimpiya İdman Kompleksi ilə tanışlıqdan sonra rayon ictimaiyyətinin nümayəndələri ilə görüşdü.

Prezident İLHAM ƏLİYEV mərasim iştirakçılarına müraciətlə dedi:

- Sizi çox gözəl Olimpiya İdman Kompleksinin açılışı münasibətilə təbrik edirəm. Bu, çox gözəl idman qurğusudur. Mənim yadımdadır ki, üç il bundan əvvəl bu kompleksin təməlini qoyduq. Bu yeri seçdik və o vaxt burada heç nə yox idi, boş bir yer idi. Amma indi burada gözəl park, gözəl olimpiya kompleksi, açıq meydançalar var. Gördüyünüz kimi, uşaqlar burada məşq edirlər, idmanla məşğul olurlar, bu, çox sevindirici haldır. Yəni Kürdəmirə layiq olan bir idman qurğusudur. Mən əminəm ki, buradan uşaqlar, yeniyetmələr, gənclər və böyüklər, necə deyərlər, yaşlı nəsil də istifadə edəcəkdir. Çünki burada həm idman qurğusu, həm də müxtəlif trenajorlar var. Buradan həm idmançılar, həm də rayon sakinləri istifadə etməlidirlər. Sizi bu gözəl hadisə münasibətilə təbrik edirəm.

OQTAY BABAYEV (rayon ağsaqqalı, ziyalı): Cənab Prezident, Sizi Kürdəmir rayonunun bütün ziyalıları, ağsaqqaları, sakinləri adından salamlayıram. Kürdəmirə xoş gəlmisiniz, səfa gətirmisiniz. Sizin hər bir gəlişiniz rayona yenilik gətirir, tərəqqi, inkişaf gətirir. Siz özünüz də bu gün bunun əyani surətdə şahidi oldunuz.

Biz kürdəmirlilər, bütün respublika əhalisi neçə gündür televizya ekranlarından Sizin rayonlara, regionlara səfərlərinizi izləyirik. Getdiyiniz rayonlarda aeroport, stadion, parklar, - sayıb qurtarmaq mümkün deyil, açılır. Özü də bu verilişlərə təkcə Azərbaycan baxmır, bütün dünya baxır. Demək, Azərbaycan çox nəhəng addımlarla irəliləyir, tərəqqi edir, çiçəklənir, tikinti abadlıq işləri geniş vüsət alır. Şübhəsiz, bütün bunlar hamısı rayonumuzun əhalisində, eyni zamanda, respublikamızın ziyalılarında böyük ruh yüksəkliyi yaradır. Biz qürur, iftixar hissləri keçiririk.

Cənab Prezident, biz bunun hamısını mərhum Prezidentimiz Heydər Əliyevin siyasi xəttinin, ideyalarının təntənəsi hesab edirik. Çünki Heydər Əliyevin Azərbaycana rəhbərlik dövrü xalqımızın, tariximizin ən şərəfli, ən unudulmaz səhifəsidir. Heydər Əliyev Azərbaycanın müstəqilliyinin dövlətçiliyinin, beşiyi başında duraraq, ölkəmizə rəhbərlik missiyasını düz 34 il öz qüdrətli çiyinlərində XX əsrdən XXI əsrə apardı. Ürəyini məşəl edərək, xalqın yoluna işıq saldı. Dünyada çox böyük şəxsiyyətlər olubdur. Çox vaxt onları Heydər Əliyevlə müqayisə edirlər. Amma mən elə bir Prezident görməmişəm ki, o, həyatdan gedəndən dünyasını dəyişəndən sonra onun adına təkcə ölkəsində yox, bütün dünyada bu qədər abidə ucaldılsın, xiyabanlar, muzey yaradılsın və xatirəsi anılsın. Siz Türkiyədə, Gürcüstanda, Müstəqil Dövlətlər Birliyi məkanında, Avropada olanda Heydər Əliyevin abidəsini ziyarət edirsiniz. Bu, hələ heç bir dövlət başçısına müyəssər olmamışdır. Ona görə bir daha təkrar edirəm ki, biz ziyalılar onunla fəxr edirik.

Cənab Prezident, yaxşı xatırlayırsınız, düzgün qeyd etdiniz ki, 2005-ci ilin 6 oktyabrında Siz Milli Məclisə seçkilər ərəfəsində Kürdəmirdə oldunuz və Heydər Əliyevin abidəsinin, Heydər Əliyev Muzeyinin açılış mərasimlərində iştirak etdiniz. Siz orada proqram xarakterli çıxış etdiniz və o çıxışınızda rayonda gedən tikinti-abadlıq işlərini yüksək qiymətləndirdiniz. Rayon sakinlərinin, rayon icra hakimiyyəti başçısının işlərinə müsbət qiymət verdiniz. Siz bu rayondan cəmi üç ildir getmisiniz. Lakin rayonda görülmüş işlərin əhatəsi 15-20 ilə bərabərdir.

Sizə deyim ki, qısa müddət ərzində rayonda 22 məktəb binası və korpusu tikilmişdir. Yəni 6 min şagird üçün sinif otaqları inşa olunmuşdur. Təkcə builki dərs ilində ən müasir standartlara cavab verən 5 məktəb binası istifadəyə verilmişdir. Bunlar hər cür əyani vasitələrlə, kompyuterlərlə təchiz olunmuşdur. Bu, nəinki rayonumzun, respublikamızın tarixində misli görünməmiş böyük bir hadisədir. Bütün bunların hamısı bizi böyük qələbəyə, yeni nailiyyətlərə daha da ruhlandırır.

Cənab Prezident, vaxt keçsə də, Sizin iş metodunuzun bir-iki məqamını demək istəyirəm. Siz Azərbaycan Respublikasının sosial-iqtisadi inkişafı haqqında Dövlət proqramını qəbul etdiniz. Mənim imkanım olsa, bu proqramı qızıl hərflərlə Azərbaycan xalqının tarixinə yazaram. Azərbaycanda belə bir proqramın qəbulundan sonra bütün respublika yeniləşmiş, tikinti-abadlıq işləri böyük miqyas almış, Azərbaycanın sosial-iqtisadi qüdrəti, beynəlxalq nüfuzu yüksəlmiş, xalqın rifah halı yaxşılaşmışdır. Bu proqram tarixə qızıl hərflərlə düşəsi sənəddir. Ona görə bu proqram baş tutdu ki, cənab Prezident, Siz onun yerinə yetirilməsini izləmək üçün rayonlarda olursunuz. Hətta elə rayon var ki, üç dəfə olmusunuz. Gedib görürsünüz və əgər o sənədin icrasında bir boşluq varsa, problem varsa, Bakıya qayıdandan sonra dərhal Sərəncam verirsiniz. Bizim rayon haqqında da belə oldu.

O vaxt buradakı açılış mərasimindən sonra Siz Sabirabadda geniş müşavirə keçirdiniz. Bizim icra hakimiyyətinin başçısı o müşavirədə iştirak etdi, çıxışında su, nəqliyyat məsələləri haqqında təklif irəli sürdü. Siz onun çıxışına dərhal reaksiya verdiniz və Bakıya qayıdan kimi, nəinki Kürdəmir haqqında, həm də Sabirabad, Saatlı haqqında da xüsusi Sərəncam imzaladınız. 40-50 il su görməyən Kürdəmirə keçən ilin dekabrında İsmayıllı rayonunun Külüllü kəndindən bulaq suyu gəldi. 40-42 dərəcə isti olan rayonda bulaq suyu içirsənsə, bunun ləzzətini ancaq onu içən kürdəmirlilər bilir. Nəinki suya, digər məsələlərə görə Sizə, Heydər Əliyev ailəsinə, ulu öndərə o qədər böyük məhəbbətimiz, hörmətimiz var ki, inanın, bunu izah etməyə, deməyə mənim nə qüdrətim, nə sözüm çatır. Sizə rayonda çox böyük, hədsiz məhəbbət və hörmət vardır.

Siz daim xalqın, kütlənin içində olursunuz.

Siz 2009-2013-cü illər üçün yeni Dövlət proqramının hazırlanması barədə tapşırıq vermisiniz.

İLHAM ƏLİYEV: Bəli, hazırlanır.

OQTAY BABAYEV: Azərbaycan daha qüdrətli, daha gözəl olacaqdır. Azərbaycan indi də, gələcəkdə də bütün Şərq, deyərdim ki, Avropa üçün də nümunəvi bir respublika olacaqdır.

İLHAM ƏLİYEV: Sağ olun, xoş sözlərinizə görə təşəkkür edirəm. Mən çox şadam ki, bu gözəl Olimpiya İdman Kompleksinin açılışında yenidən sizinlə bərabər Kürdəmirdəyəm. Bu, bizim birgə gördüyümüz işlərin əyani sübutudur. Üç il bundan əvvəl kompleksin təməli qoyuldu. Bu gün isə gözəl idman qurğusu istifadəyə verilir. Siz qeyd etdiniz ki, son üç il ərzində Kürdəmirdə çox böyük işlər görülübdür. Çox böyük abadlıq, quruculuq işləri, məktəb tikintisi, sosial obyektlərin, yeni sənaye sahələrinin işə düşməsi - bütün bunlar Azərbaycanı gücləndirir. Regionların sosial-iqtisadi inkişafı Dövlət proqramının əsas məqsədi məhz bundan ibarətdir.

Mən xatırlayıram, biz proqramı 2004-cü ilin fevral ayında rəsmən qəbul etdik. Əlbəttə, mən o vaxt bu proqramın üzərində çox işləmişdim və bilirdim ki, biz onu icra edəcəyik. Bəzi fikirlər var idi ki, bu, sadəcə olaraq, növbəti yeni bir niyyət proqramıdır. Orada müəyyən tədbirlər göstərilir, ancaq onların bir hissəsi çətin ki, yerinə yetirilsin. Amma proqramda göstərilən bütün məsələlər yerinə yetirildi və ondan əlavə, 2004-cü ildə proqramda nəzərdə tutulmamış bir çox obyektlər işə düşdü: aeroportlar, xəstəxanalar, idman qurğuları, yollar. Bakı-Kürdəmir yolu ən yüksək dünya səviyyəsindədir. Bu yol Gəncəyə qədər davam edir və Gəncə-Qazax avtomobil yolu artıq hazırdır. Bütün istiqamətlərdə yollar çəkilir, bütün bölgələrdə quruculuq-abadlıq işləri aparılır.

İşsizlik məsələsi ən çətin məsələdir. Bütün postsovet məkanı üçün ən böyük problem işsizlik, yoxsulluqdur. Biz, demək olar ki, işsizliyin böyük hissəsini aradan götürmüşük. Bu gün işləmək istəyən iş tapar. 700 mindən çox yeni iş yeri açılmışdır, onlardan 600 minə qədəri daimi iş yerləridir. Bu gün Azərbaycana başqa ölkələrdən işləmək üçün işçi qüvvəsi gəlir. Bu, nəyi göstərir?! Onu göstərir ki, artıq Azərbaycanda işsizlik problemi yoxdur. Digər tərəfdən, nəyə görə gəlirlər?! Çünki bilirlər ki, Azərbaycan inkişaf edən ölkədir, Azərbaycanda sabitlik, əmin-amanlıq var, tolerantlıq, başqa millətlərə qarşı xoş münasibət var və ölkənin ümumi inkişafı buna gətirib çıxarır. Yəni biz bütün bu gözəl hadisələri bütün bölgələrdə görürük. Hər bir yerdə, hər bir rayonda inkişaf gedir və bu işlər əhali tərəfindən çox bəyənilir, dəstəklənir. Bizim insanlarımız bütün bu işlərin ən fəal iştirakçılarıdır. Əgər yerlərdə insanlar bu işlərlə məşğul olmasaydılar, bizim bütün proqramlarımız kağız üzərində qalacaqdı. Bizim uğurumuzun əsas səbəbi ondan ibarətdir ki, düzgün qərarlar qəbul edilir, nəzarət güclüdür və yerlərdə qərarlar icra olunur.

Əlbəttə ki, bizim bütün bu işləri görmək üçün maddi imkanlarımız artır. Əgər bu olmasaydı, biz buna nail ola bilməzdik. Bizim dövlət büdcəmiz son beş il ərzində 10 dəfədən çox artıbdır. Valyuta ehtiyatlarımız, sosial məsələlərin həllinə ayrılmış vəsait, maaşlar, pensiyalar artıbdır. Azərbaycanda iqtisadi inkişaf elədir ki, o, bütün dünya üçün nümunədir. İqtisadi artım baxımından Azərbaycan ardıcıl dörd il dünya miqyasında birinci yerdədir. Bu, reallıqdır, faktdır, statistikadır. Biz bunu həm iqtisadi göstəricilərdə, həm də gündəlik həyatda görürük.

Bizim ölkəmiz yeniləşir, yenidən qurulur. Siz ulu öndər Heydər Əliyevin Azərbaycan xalqına xidmətlərini qeyd etdiniz. Hamımız - siz də, mən də yaxşı xatırlayırıq ki, 1970-80-ci illərdə o, nə qədər böyük işlər görübdür. O vaxt hakimiyyətə gələndə ən geridə qalmış respublika Azərbaycan idi. O, 1982-ci ildə Azərbaycandan Moskvaya gedəndə isə Azərbaycan ən qabaqcıl respublika idi. Tarix yenə təkrarlandı. Azərbaycan müstəqillik ərəfəsində, əfsuslar olsun ki, çox ağır vəziyyətə düşmüşdü. Nəyə görə?! Çünki Azərbaycana rəhbərlik edən insanlar öz vəzifə borcunu yerinə yetirə bilməmişlər. Bəziləri xəyanət ediblər, bəziləri, sadəcə olaraq, işin öhdəsindən gələ bilməmişlər.

1988-ci ildən yavaş-yavaş bütün iqtisadiyyat, sənaye, kənd təsərrüfatı tənəzzülə uğradı, tamamilə məhv olundu. Antialkoqol kampaniyası aparılmışdı, bütün üzüm bağları dağıdıldı. Nə üçün Azərbaycanda dağıdıldı?! Üzüm istehsalı Gürcüstanda, Ukraynada, Moldovada, Ermənistanda da var idi. Orada niyə üzüm bağlarına dəymədilər, bunları məhz Azərbaycanda qırdılar?! Çünki həm Sovet İttifaqının o illərdəki mərkəzi hökumətinin Azərbaycana münasibəti mənfi idi, həm də yerli rəhbərlər, Azərbaycanın maraqlarını qoruya bilməmişlər. Müstəqillik əldə ediləndə ən ağır vəziyyətdə yenə Azərbaycan oldu. Ermənistanın işğalı, torpaqlarımızın işğal altına düşməsi, vətəndaş müharibəsi və demək olar ki, iqtisadi iflic. Əgər belə davam etsəydi, ümumiyyətlə, ölkəmizin gələcəyi sual altında ola bilərdi.

Yenə Azərbaycan xalqı öz müdrikliyini göstərdi, 1993-cü ildə Heydər Əliyevi hakimiyyətə dəvət etdi. Nə baş verdi? Bütün xoşagəlməz məsələlərə tədricən son qoyuldu, sabitlik yarandı. Qanunsuz dəstələr, silahlı birləşmələr Azərbaycana meydan oxuyurdu - hamısı zərərsizləşdirildi, sabitlik yarandı və inkişaf dövrü başladı. 1993-2003-cü illər inkişaf dövrüdür. Bütün ağır problemlər həll olunmağa başlamışdı - sabitlik, yenilik və müasirlik.

Son dövr, 2003-2008-ci illər isə, sadəcə olaraq, 1993-2003-cü illərin məntiqi davamıdır. Bizim həm iqtisadi imkanlarımız artır, həm də bölgədə mövqeyimiz daha da güclüdür. Biz, Azərbaycan istənilən məsələni həll edə bilərik. Biz öz gücümüzə, öz maliyyə imkanlarımıza arxalanaraq bunları edirik. Hər şeyi xalq üçün edirik. Azərbaycan xalqı yaxşı yaşamalıdır - bütün rayonlarda, hər bir kənddə.

Siz çox düzgün qeyd etdiniz, növbəti, 2009-2013-cü illər üçün regional inkişaf proqramı hazırlanır. O Proqramda bütün qalan, bu günə qədər həll olunmamış məsələlər öz həllini tapacaqdır. Hər bir rayon üzrə, hər bir kənd üzrə. Belə ki, bütün sosial-iqtisadi məsələlər, infrastruktur məsələləri öz həllini tapsın və ölkəmiz daha da sürətlə inkişaf etsin.

Bizim əldə etdiyimiz nailiyyətlər bu gün artıq bütün dünya tərəfindən bilinir, qəbul edilir. Azərbaycan nəinki bu bölgənin lider dövlətidir, Azərbaycan həm də dünya üçün çox önəmli ölkəyə çevrilir. Biz Avropanın enerji təhlükəsizliyi məsələlərinə öz töhfəmizi veririk. Bizim iştirakımız olmadan nəhəng qlobal layihələr icra oluna bilməz. Bölgədə gedən proseslər, bölgədəki vəziyyət, sabitlik bir çox hallarda bizim fəaliyyətimizdən, təşəbbüslərimizdən və siyasətimizdən asılıdır. Əlbəttə, bu, bizim hamımızı sevindirir. Hər bir vətəndaş sevinir ki, onun dövləti güclənir, onun dövlətinin hörməti artır, imkanları artır. Həm beynəlxalq müstəvidə, həm ölkə daxilində. Bax bu gözəl Olimpiya İdman Kompleksi, sadəcə olaraq, son illər ərzində görülən işlərin kiçik bir nümunəsidir. Belə komplekslər Azərbaycanın müxtəlif bölgələrində tikilibdir.

İndi mən Kürdəmir rayonunda yeni konserv zavodunun açılışına gedəcəyəm. Eşitdiyimə görə, o da böyük bir sənaye müəssisəsidir. Belə müəssisələr həm yeni iş yerləri, həm yerli istehsal, həm də idxaldan asılılığın azaldılması deməkdir. Statistik məlumata görə biz bu gün özümüzü ərzaq məhsulları ilə təxminən 90-95 faiz təmin edirik. Siz yaxşı xatırlayırsınız, sovet vaxtında vahid kənd təsərrüfatı kompleksi mövcud idi. Burada pambıq əkilirdi, üzüm əkilirdi. Rusiyadan buraya yağ, ət və başqa ərzaq məhsulları gətirilirdi. Amma indi özümüz-özümüzü təmin edirik. Təkcə taxılda idxaldan asılılığımız bir az çox idi. Əlavə tədbirlər gördük - güzəştli şərtlərlə gübrənin verilməsi, yanacağın verilməsi nəticəsində bu il 400 min ton artıq taxıl yığılıbdır. Yenə əlavə tədbirlər görülür, yeni anbarlar tikiləcək, “Aqroservis”, “Aqrolizinq” güzəştli şərtlərlə fermerlərə gübrə verəcək. Onun pulunun cəmi 30 faizini ödəyəcəklər, yanacağın isə 50 faizini. Ona görə ki, biz istehsalı stimullaşdıraq, daha da çox istehsal olsun, idxaldan daha da az asılılıq olsun ki, Azərbaycan ərzaq təhlükəsizliyini təmin etsin. Belə olan halda, biz uzunmüddətli inkişafımıza, dayanıqlı inkişafa nail olacağıq. Neft-qaz amilindən asılılıq olmayacaqdır. Mən həmişə demişəm, bunlar bizə Allah tərəfindən verilən böyük sərvətdir. Biz onlardan səmərəli istifadə etməliyik və edirik. Ancaq elə olmamalıdır ki, bizim neftimiz, qazımız var, gəlin heç nə etməyək, oturaq və təkcə o pullarımızdan istifadə edək. Yox, biz gərək onu qoyaq kənara. Amma işləyək, qeyri-neft sektorunu, kənd təsərrüfatını, yerli sənayeni inkişaf etdirək və bütün sosial infrastrukturu yeniləşdirək.

Mən əminəm və heç şübhəm yoxdur ki, bizim gələcək inkişafımız da uğurlu olacaqdır. Buna nail olmaq üçün bütün zəruri amillər var: sabitlik, inkişaf, konkret proqramlar, sosial siyasət, xalq tərəfindən bütün bizim təşəbbüslərimizə müsbət yanaşma və dəstək. Əgər bu dəstək olmasaydı, biz heç nəyə nail ola bilməzdik. Uzaq və yaxın tarix göstərir harada ki, xalqla iqtidar arasında birlik yoxdur, orada heç bir iş görülə bilmir. Daim böhranlı vəziyyət, daim qarşıdurma, daim qarşılıqlı ittihamlar olur. Biz görürük ətrafda nələr baş verir. Bizim uğurumuzun əsas səbəbi odur ki, xalqla iqtidar arasında birlik var. Bax, siz qeyd edirsiniz ki, mən rayonlarda tez-tez oluram. Bəli, gedirəm ki, xalqla bir yerdə olum. Çünki mən sizə xidmət edirəm. Beş il bundan əvvəl mən bu vəzifəyə o məqsədlə gəlmişəm ki, sizə xidmət edim. Bu, mənim vəzifə borcumdur. Mən çalışıram ki, vəzifə borcumu ləyaqətlə yerinə yetirim və sizi əmin etmək istəyirəm ki, gələcəkdə də biz çox görüşəcəyik. Kürdəmir rayonunun inkişafı üçün əlavə tədbirlər görüləcəkdir. Belə gözəl açılışlarda biz birlikdə hələ çox iştirak edəcəyik.

Mən sizə cansağlığı arzulayıram. Arzu edirəm ki, Kürdəmir rayonunun inkişafı bundan sonra da sürətlə getsin. Sağ olun.