Laçın yolunda Azərbaycanın nəzarət-buraxılış məntəqəsi erməni silahlılarının təminat və təchizatının qarşısını alacaq
Bakı, 27 aprel, AZƏRTAC
Həm işğal dövründə, həm Vətən müharibəsi zamanı, həm də müharibədən sonrakı müddətdə Laçın-Xankəndi yolunun kimin nəzarətində olması münaqişə tərəfləri üçün daim böyük əhəmiyyət daşıyıb. Ermənistan müharibədən əvvəl 26 illik danışıqlar aparıldığı müddətdə heç zaman Laçın və Kəlbəcər məsələsini danışıqlar predmetinin tərkibində görmək istəməyib. Adətən onu 5+2 formatına uyğun şəkildə bu danışıqlar prosesini sonrakı mərhələyə saxlamağı planlaşdırırdı. Lakin İkinci Qarabağ müharibəsində tarixi Qələbədən sonra Prezident, Ali Baş Komandan İlham Əliyevin qətiyyətli və ardıcıl siyasətinin nəticəsində aprelin 23-də Laçın-Xankəndi yolunda Azərbaycanın nəzarət-buraxılış məntəqəsi yaradıldı. Ermənistandan Qarabağa silah-sursat, mina, şəxsi heyət və texnika daşınmasının sonuncu marşrutu da Azərbaycanın nəzarətinə keçdi.
Bu fikirləri AZƏRTAC-a açıqlamasında hərbi ekspert Ədalət Verdiyev söyləyib.
Onun sözlərinə görə, bu yolun Azərbaycanın nəzarətində olması ilə qeyri-qanuni daşınmalar tamamilə məhdudlaşdırıldı. Danışıqlar zamanı əvvəllər dəhliz adlandırılan ərazinin eninin beş kilometr elan edilməsi də Prezident İlham Əliyevin sərt və barışmaz mövqeyi nəticəsində mümkün oldu. Rusiya və Ermənistan tərəfi bu yolun eninin 20 kilometr və düşmən ölkənin nəzarətində olmasını tələb edirdi. Lakin buna yol verilmədi. Beləliklə, həmin 20 kilometrlik yol beş kilometrədək endirildi. Bu da Prezident İlham Əliyevin sərt mövqeyi nəticəsində əldə olunan nəticədir. Digər tərəfdən isə biz Laçın yolunun Azərbaycanın nəzarətinə keçməsi üçün 3 il ərzində üzərimizə götürdüyümüz yeni yolun inşası üzrə öhdəlikləri cəmi ilyarım müddətində yerinə yetirdik.
Ədalət Verdiyev qeyd edib ki, Ermənistan tərəfi isə tikilməsi üzərinə düşən cəmi yeddi kilometrlik yolu inşa etməkdə kifayət qədər ləngimələrə yol verirdi. Hətta bu yolla bağlı ötən ilin yayında bir neçə dəfə də təxribatlar törədilmişdi. Bütün bunlar vasitəsilə Ermənistan əsas Laçın yolunu maksimum müddətdə gec istifadə etmək niyyətində idi. Bununla da prosesləri ləngidəcəyini düşünürdü. Həmin təxribatlara baxmayaraq, alternativ yol hazır olduqdan az sonra Laçın rayonunun Sus və Zabux kəndləri Azərbaycan nəzarətinə keçdi və sentyabrda Prezident İlham Əliyev Laçın rayonunda bayrağımızı qaldırdı. Azərbaycan Laçın-Xankəndi yolunda nəzarət-buraxılış məntəqəsini yaratmaqla həm ermənilərin təxribatlarının qarşısını almağa nail oldu, həm də ərazi bütövlüyümüzün tam bərpa etdiyini təsdiqlədi.
“Nəticə etibarilə hazırda Azərbaycan Dövlət Sərhədi Xidmətinin Laçın-Xankəndi yolunda nəzarət-buraxılış məntəqəsini yerləşdirməsi paralel olaraq böyük Ermənistan ideyasının tamamilə məhv edildiyinin də göstəricisidir. Nəzarət-buraxılış məntəqəsinin quraşdırılması müxtəlif yollarla Qarabağa silah daşınmasını tam məhdudlaşdıracaq. Bu isə Qarabağda mövcud olan 10 min nəfərlik erməni silahlılarından ibarət birləşmələrin təminat və təchizatının qarşısını alacaq. Bu yaxın perspektivdə Azərbaycan Ordusuna erməni silahlılarının ərazilərimizdən daha qısa müddətdə və minimal itkilərlə təmizlənməsinə imkan yaradacaq”, - deyə ekspert vurğulayıb.
Bölmənin digər xəbərləri
