LƏNKƏRANDA AQRAR BÖLMƏNİN İNKİŞAFINA DİQQƏT ARTMIŞDIR
AZƏRTAC-ın müxbiri xəbər verir ki, regionların sosial-iqtisadi inkişafı Dövlət Proqramında nəzərdə tutulan tədbirlərə müvafiq olaraq Lənkəran rayonunda aqrar bölmənin dinamik inkişafına diqqət artmışdır. Azərbaycan Prezidentinin 2007-ci il 23 yanvar tarixli “Kənd təsərrüfatı məhsulları istehsalçılarına dövlət dəstəyi haqqında” Sərəncamı rayon iqtisadiyyatında xüsusi çəkisi olan bu sahənin inkişafına güclü təkan vermişdir.
Rayonda sahibkarlığı inkişaf etdirmək məqsədi ilə yaradılan istehsal kooperativləri, kəndli-fermer təsərrüfatları və torpaq mülkiyyətçiləri tərəfindən 2007-ci təsərrüfat ilində 975,5 hektar sahədə taxıl, 5620,5 hektarda tərəvəz, 874 hektarda kartof, 691 hektarda paxlalı və 265 hektar sahədə isə bostan bitkiləri əkilmişdir.
Bu ilin məhsul yığımı zamanı 1824 ton taxıl, 96320 ton tərəvəz, 7441 ton kartof məhsulları istehsal edilmişdir.
2007-ci ildə rayonda çayçılığın inkişafına da diqqət artırılmış, 99,2 hektar sahədə yeni sitrus və meyvə bağları salınmışdır.
Çay, sitrus və subtropik meyvə bağlarının bərpası məqsədi İlə Lənkəran çay filialında yeni tinglik təsərrüfatı yaradılmışdır.
Rayonda fəaliyyət göstərən “Aqrolizinq” ASC torpaqların əkinə hazırlanması, becərmə və yığım zamanı kənd əməkçilərinə yaxından köməklik göstərir.
Lənkəranlı fermerlər və torpaq mülkiyyətçiləri hər həftənin şənbə və bazar günlərı Bakı şəhərində təşkil olunan kənd təsərrüfatı məhsullarının satış yarmarkasında da fəal iştirak edirlər. İndiyədək paytaxt sakinlərinə 100 tona yaxın məhsul satılmışdır.
Bölmənin digər xəbərləri
