Lənkəranda avtomat telefon stansiyaları tam elektronlaşdırılıb
Lənkəran, 19 noyabr, Bağır Əliyev, AZƏRTAC
Bu ilin doqquz ayında Lənkəran rayonunda əhaliyə göstərilən informasiya və rabitə xidmətlərinin dəyəri real ifadədə 3,8 faiz artıb. Bu sahədə əldə edilmiş gəlirin 1,8 faizi qeyri-dövlət sektorunun payına düşür.
Bu barədə Lənkəran rayon Statistika İdarəsindən AZƏRTAC-ın bölgə müxbirinə məlumat verilib.
Bildirilib ki, Lənkəran əhalisinin telefon rabitəsi ilə təminatı yüksək səviyyədədir. 2020-ci il yanvarın əvvəlinə rayonda mənzillərdə əsas telefon aparatlarının sayı 31096 təşkil edib. Bu gün rayonda hər yüz ailədən 66-sı telefon rabitəsi ilə təmin olunub. Telefon ATS-ləri tam elektronlaşdırılıb.
Diqqətə çatdırılıb ki, bu dövrdə rayonun informasiya və rabitə müəssisələrində 279 nəfər işçi çalışıb. Bir işçinin orta aylıq əmək haqqı 431,2 manat olmaqla ötən ilin müvafiq dövrü ilə müqayisədə 6,1 faiz artıb.
Bölmənin digər xəbərləri
