LİTVANIN SABİQ PREZİDENTİ DÖVLƏT BAŞÇISI VƏZİFƏSİ UĞRUNDA MÜBARİZƏYƏ QOŞULUR

26.04.2004 [20:20]
Çap et
A⁺ A^-

AZƏRTAC İTAR-TASS agentliyinə istinadla xəbər verir ki, Litvanın Mərkəzi Seçki Komissiyası ölkə prezidenti vəzifəsinə yeddinci namizədi qeydiyyata almışdır. Bu, sabiq prezident Valdas Adamkusdur.

Yeni namizəd bildirmişdir ki, “onu bu addımı atmağa vadar edən başlıca səbəb Litvanın yaxşı adını dünya ictimaiyyətinin nəzərində bərpa etməkdir. Prezidentliyə namizədliyini yenidən irəli sürən əvvəlki dövlət başçısı andını və Konstitusiyanı kobudcasına pozmaqla ölkəni nüfuzdan salmışdır”.

Qələbəyə daha çox imkanı olan Adamkusun namizədliyini iki sağ partiya – mühafizəkarlar və liberal-mərkəzçilər irəli sürmüşdür. O, 2003-cü ilin yanvarında keçirilmiş prezident seçkilərinin ikinci turunda azacıq fərqlə Rolandas Paksasa uduzmuşdu.

Litvada növbədənkənar prezident seçkiləri iyunun 13-də keçiriləcəkdir.