Livanın druz lideri Suriyada daxili problemlərin dialoq yolu ilə həllinə çağırıb
Qahirə, 17 iyul, AZƏRTAC
Livan druzlarının liderlərindən biri Vəlid Cunbulat İsrailin Dəməşqə son hücumlarını pisləyib, onu Suriyanın milli təhlükəsizliyinə açıq təcavüz adlandırıb.
AZƏRTAC Suriyanın SANA agentliyinə istinadla xəbər verir ki, Cunbulat Suriyanın mərkəzi dövlət institutlarının druzların sıx məskunlaşdığı Cəbəl əl-Arabda sabitliyin yaradılmasında rolunun vacibliyini vurğulayıb.
Suriya hökumətinə qarşı çıxan bəzi yerli druz liderlərini ehtiyatlı olmağa səsləyən Cunbulat problemlərin zor gücü ilə deyil, müzakirə masasında Suriyanın suverenliyi və ərazi bütövlüyü çərçivəsində həllinin zəruriliyini qeyd edib. “İsrail Suveydada druzları himayə etmir. Baxmayaraq ki, bunu iddia edir. Əksinə, öz müdaxilələrini həyata keçirmək üçün bəzi yerli liderlərdən istifadə edir”, - deyə Cunbulat bildirib.
Suveyda vilayətində baş verən son hadisələrə toxunan druz lideri böhranın həqiqi milli barışıq və razılıq əsasında islahatların aparılmasında həll edilə biləcəyinə inamını ifadə edib.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
