Liviya sahillərinə yaxın ərazidə dənizdən 22 miqrantın cəsədi çıxarılıb
Qahirə, 24 avqust, AZƏRTAC
Liviyaya məxsus gəmi ölkənin sahilyanı Zuara qəsəbəsi yaxınlığında Avropaya keçmək istəyən 22 qanunsuz miqrantın cəsədini dənizdən çıxarıb.
AZƏRTAC xəbər verir ki, bu barədə Beynəlxalq Miqrasiya Təşkilatı məlumat yayıb. Cəsədlər Liviyanın Qırmızı Aypara Cəmiyyətinə təhvil verilib.
Beynəlxalq Miqrasiya Təşkilatının Liviya üzrə missiyasının rəhbəri Federiko Soda bildirib ki, miqrantları daşıyan qayıq batıb və 37 nəfəri xilas etmək mümkün olub. Aralarında uşaq və qadınların da olduğu daha 23 miqrant itkin düşüb. Balıqçı gəmiləri onların axtarışını davam etdirir.
Təşkilatın Cenevrədəki ofisinin sözçüsü Safa Msehli bildirib ki, son aylarda Tripolidən Avropaya keçmək istəyən 302 miqrant dənizdə boğulub. Afrika mənşəli olan son qurbanların milli mənsubiyyəti müəyyən edilməyib.
Beynəlxalq Miqrasiya Təşkilatının hesabatında qeyd olunub ki, son bir ildə 100 mindən çox miqrant Aralıq dənizi vasitəsilə Avropaya yollanıb. Onlardan 1200-ü həyatını itirib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
