Luiziana sahillərində gəminin batması nəticəsində beş nəfər ölüb
Bakı, 20 aprel, AZƏRTAC
Xilasedicilər ABŞ-ın Luiziana ştatı sahillərində yük gəmisinin çevrilərək batması nəticəsində həlak olan beş nəfərin cəsədini aşkarlayıb.
AZƏRTAC “New York Times” qəzetinə istinadla xəbər verir ki, ABŞ-ın Sahil Mühafizə Xidmətinin məlumatına əsasən, itkin düşən səkkiz nəfərin axtarışları dayandırılıb.
“Təəssüf ki, qəza zamanı itkin düşən beş nəfərin cəsədi aşkarlanıb. Hazırda səkkiz nəfərin taleyindən xəbərimiz yoxdur”, - deyə Sahil Mühafizə Xidmətinin kapitanı Uill Uotson jurnalistlər üçün təşkil olunan brifinqdə bildirib.
Xidmətin relizində xilasedici və könüllülərin 175 saat və ya fasiləsiz olaraq altı gün axtarış apardığı vurğulanıb.
“Axtarış əməliyyatının dayandırılması Sahil Mühafizə Xidmətinin qəbul etdiyi ən ağır qərardır... həlak olanların ailələrinə, dostlarına və yaxınlarına, həmçinin faciənin toxunduğu hər kəsə dərin və səmimi başsağlığı diləyirəm”, - deyə relizdə Uill Uotsondan sitat gətirilib.
Qeyd edək ki, Sahil Mühafizə Xidməti aprelin 13-də 39 metrlik ticarət gəmisinin qəzaya uğraması barədə həyəcan siqnalı qəbul edib. İnsident zamanı gəminin göyərtəsində olan 19 nəfərdən 6-sını xilas etmək mümkün olub.
Bölmənin digər xəbərləri
