Lukaşenko Minskdə keçiriləcək Avropa oyunlarında Belarus atletlərindən azı 43 medal gözləyir
Bakı, 15 aprel, AZƏRTAC
İyun ayında Minskdə keçiriləcək İkinci Avropa Oyunlarında Belarus yığması azı 43 medal qazanmalıdır.
AZƏRTAC TASS agentliyinə istinadla xəbər verir ki, Belarus Prezidenti Aleksandr Lukaşenko bu fikri bazar ertəsi Belarus Milli Olimpiya Komitəsi İcraiyyə Komitəsinin iclasında söyləyib.
2015-ci il iyunun 12-dən 28-dək Bakıda keçirilmiş Birinci Avropa Oyunlarında belaruslu idmançılar 43 medal, o cümlədən 10 qızıl, 11 gümüş və 22 bürünc medal qazanıblar. Qeyri-rəsmi komanda hesabında Belarus yığması yeddinci yeri tutub.
A.Lukaşenko deyib: “Biz hansı idman nəticəsi göstərməyə çalışırıq. Oyunlarda medallar barədə planlar səslənməyib, lakin bizim qarşımızda konkret vəzifə var: bu nəticə Bakıdakından aşağı olmamalıdır”. Prezident əlavə edib ki, Belarus idmançıları öz evlərində, öz arenalarında, doğma tamaşaçıların qarşısında yarışacaqlar, buna görə də belaruslu atletlərin bu oyunlarda pis çıxış etməyə haqqı yoxdur.
“İstərdim ki, bu tələb idmançılara və məşqçilərə çatdırılsın. Siz onları mübarizəyə ruhlandırın, qələbəyə istiqamətləndirin”, - deyən Lukaşenko qeyd edib ki, belaruslular dünya idman arenasında yüksək nəticələr göstərməyə qabildirlər. Bu yaxınlarda ağır atletika üzrə Avropa çempionatı bunu sübut etdi. Lakin, eyni zamanda, biatlonçuların, futbolçuların və xokkeyçilərin uğursuz çıxışlarını da xatırladan Lukaşenko qeyd edib ki, medallar təkcə idman nəticəsi deyil, həm də Vətənin şərəfi və şöhrətidir. Prezident deyib: “Bu, döyüşdür, istəsəniz lap müharibədir, amma ölüm-dirim savaşı deyil. Bu, hər bir dövlətin xalqına ruh yüksəkliyi gətirən ideologiyadır”.
Lukaşenko qeyd edib ki, bu il iyunun 21-dən 30-dək Minskdə keçiriləcək İkinci Avropa oyunları müstəqil Belarusun tarixində çox mühüm ictimai-siyasi tədbirdir. Prezident deyib: “Bu günlər ərzində biz dünya birliyinin diqqət mərkəzində olacağıq. Vəzifəmiz təkcə oyunları ən yüksək səviyyədə keçirtməklə bitmir. Biz növbəti dəfə göstərməliyik ki, bizim diyarda insanın həyatı və öz imkanlarını reallaşdırması üçün rahat və təhlükəsiz şərait yaradılıb, bu isə az əhəmiyyət kəsb etmir”.
Bölmənin digər xəbərləri
