Bakı, 23 noyabr, AZƏRTAC

Lüksemburq Deputatlar Palatasının Azərbaycanla bağlı qəbul etdiyi qərəzli qətnamə qəbuledilməzdir. Qətnamədə Azərbaycan əleyhinə əsassız iddialar yer almaqla yanaşı, ölkəmizdə keçirilən seçkilər haqqında böhtan dolu fikirlər verilib.

Bunu AZƏRTAC-a açıqlamasında Milli Məclisin deputatı Pərvanə Vəliyeva deyib.

O qeyd edib ki, Avropa Şurası Parlament Assambleyasının (AŞPA) bu ilin yanvar ayında Azərbaycan nümayəndə heyəti haqqında qəbul etdiyi qanunsuz qərara Lüksemburqu qurumda təmsil edən deputatlar da səs verib: “Haqlı olaraq, dövlətimiz həmin qərara səs verən AŞPA-nın 76 deputatını, o cümlədən lüksemburqlu deputatlar Oktavi Moder və İv Kruxteni “persona non-qrata” elan edib. Lüksemburq parlamentinin qəbul etdiyi qətnamədə bu deputatlar haqqında qərarın ləğv edilməsinə “çağırış” olunur. Lakin lüksemburqlu deputatlar AŞPA kimi özünü “demokratik” təsisat hesab edən bir qurumda Avropa Şurasının daxili prosedurlarını kobud şəkildə pozaraq, birtərəfli qaydada Azərbaycandan olan parlamentarilərin etimadnaməsini tanımasının əleyhinə səs verdilər. Onlar sözügedən qətnaməni dəstəkləməklə, ölkəmizə qarşı riyakarlıq və siyasi ikiüzlülük göstərdikləri üçün layiqli cavabı almalı idilər.

Dövlətimizin başçısının dediyi kimi, bizə heç kim heç nəyi diktə edə bilməz, biz nəyi, nə zaman, necə icra etməyi özümüz yaxşı bilirik. Ölkəmizin beynəlxalq arenada nüfuzu, gücü elə ona qarşı haqsız ittihamlar, dezinformasiyalar yayan qurumlara layiqli və yerində cavab verməsindən irəli gəlir. COP29 zamanı Kiçik ada dövlətlərinin Liderlər Sammitində Qlobal Cənubdan olan dövlət başçıları Qlobal Cənubun maraqlarını ifadə edən, Qərbin riyakarlığını ifşa edən lider İlham Əliyevi dəqiqələrlə alqışladılar”.

Azərbaycanda azad, təşəbbüskar, inklüziv vətəndaş cəmiyyətinin formalaşdığına diqqət çəkən P.Vəliyeva deyib: “Bütün dünya COP29 zamanı müxtəlif formatlı, hətta kifayət qədər tənqidi mövqedə olan vətəndaş cəmiyyətinin aksiyalarını məhz Azərbaycanda izlədi. Əminəm ki, onlara COP29-a gəlmədən öncə danışılan yalan məlumatlarla burada gördükləri mənzərə arasında uçurum qədər fərq müşahidə edilib. İştirakçıların vətəndaş cəmiyyəti üçün yaradılan inklüziv şəraitdən məmnun qaldıqlarını deyə bilərik. COP29 Sədrliyi həm Mavi zonada, həm də Yaşıl zonada QHT-lər üçün xüsusi pavilyon ayrılmasına dəstək oldu. Eyni zamanda, konvensiya katibliyinə müraciət etməklə, bir çox QHT, həmçinin Azərbaycandan olan vətəndaş cəmiyyəti nümayəndələri Mavi zonada müəyyən olunan yerlərdə aksiyalar keçirə bildilər. Beləliklə, COP29 bütün maraqlı tərəflərin səslərinin eşidildiyi platforma kimi yadda qaldı. Bu, ən yaxşı təcrübə idi”.

Deputat hesab edir ki, qlobal iqlim böhranı ilə mübarizəyə öz töhfəsini gözləniləndən artıq verən Azərbaycanı alqışlamaq əvəzinə Lüksemburq Nümayəndələr Palatasının və Avropa Parlamentinin konfransa heç bir aidiyyəti olmayan məsələlərlə Azərbaycanın uğuruna kölgə salmağa cəhdlər göstərməsi beynəlxalq səviyyədə qınanılmalıdır.