Mahmut Erol Kılıç: Bəzi dairələr islamofobiyadan ictimai dəstək toplamaq üçün istifadə edir
Bakı, 26 may, AZƏRTAC
İslamofobiya artıq sadəcə fərdi nifrət və ya qərəzli münasibət deyil. Biz ondan ideoloji və siyasi məqsədlər üçün istifadə olunduğunu müşahidə edirik. Təəssüf ki, bəzi hallarda seçki kampaniyalarında, beynəlxalq böhranlar zamanı, xüsusilə də terror hadisələrindən sonra islamofobiya alətə çevrilir. Bəzi dairələr islamofobiyadan ictimai dəstək toplamaq üçün istifadə edir.
AZƏRTAC xəbər verir ki, bunu İslam Tarixi, İncəsənəti və Mədəniyyəti Araşdırma Mərkəzinin (IRCICA) baş direktoru Mahmut Erol Kılıç “İslamofobiya: Qərəzin ifşa olunması və stiqmaların dağıdılması” adlı beynəlxalq konfrans çərçivəsində təşkil edilən “Siyasətdə müsəlmanlara qarşı nifrət: Hüquqi çərçivələr və vəkillik strategiyaları” mövzulu plenar iclasda deyib.
O qeyd edib ki, müsəlmanlar təkcə sözdə nifrətə deyil, fiziki hücumlara da məruz qalırlar. Bu hücumların ünvanı bəzən fərdi insanlar, bəzən isə bütün dini icmalar olur. Məscidlərə edilən hücumlar, mədəniyyət mərkəzlərinin vandalizmi islamofobiyanın ən açıq və acı nümunələridir.
“Bundan əlavə, təhsil sahəsində və dövlət xidmətlərində müsəlmanlara qarşı ayrı-seçkilik halları artıb. Gənc müsəlman tələbələrin şəxsiyyətlərinə görə təzyiqlərə məruz qalması və ya müsəlman dövlət qulluqçularının karyeralarında maneələrlə üzləşməsi cəmiyyətin ən vacib sahələrində belə bərabərliyin pozulduğunu göstərir”, - deyə Mahmut Erol Kılıç bildirib.
Onun sözlərinə görə, islamofobiya ilə mübarizə yalnız qanunlarla deyil, həm də sosial şüurun formalaşdırılması, qarşılıqlı hörmətin təşviqi və dini azadlıqların qorunması ilə mümkün ola bilər.
Bölmənin digər xəbərləri
