Malik Həsənov: YAP-ın fəaliyyəti Azərbaycanın dayanıqlı inkişafına xidmət edir
Bakı, 4 mart, AZƏRTAC
Cəmiyyətin avanqard qüvvəsi olan Yeni Azərbaycan Partiyasının VII qurultayından bir il ötür. Bir ildə ölkəmizin, Yeni Azərbaycan Partiyasının həyatında baş verən yeniliklərə, əldə olunan uğurlara nəzər salsaq, bu fikri böyük əminliklə qeyd edə bilərik ki, möhkəm təməl, gələcəyə hesablanmış strategiya, təkmil islahatlar inkişafın əsasıdır.
Bu sözləri AZƏRTAC-a açıqlamasında Milli Məclisin deputatı Malik Həsənov söyləyib.
O qeyd edib ki, ölkəmizin ictimai-siyasi həyatında aparıcı rol oynayan Yeni Azərbaycan Partiyası yarandığı gündən ümumxalq partiyası adını qazanaraq daim dövlətə, xalqa xidməti fəaliyyətində əsas tutur. İrəli sürdüyü təşəbbüslərin, qəbul etdiyi qərarların, müəyyənləşdirdiyi hədəflərin təməlində də “Güclü dövlət, yüksək rifah” prinsipi dayanır. Xalqın inamını və etimadını qazanan partiya hazırda sıralarında 800 minə yaxın üzvü birləşdirir. Bu, ulu öndər Heydər Əliyevin ideyalarına sadiqliyin, Prezident İlham Əliyevin həyata keçirdiyi siyasətə inamın və dəstəyin göstəricisidir. Tarixi Zəfərimizin reallıqları fonunda keçirilən Yeni Azərbaycan Partiyasının VII qurultayındakı çıxışında dövlət başçısı, YAP Sədri İlham Əliyev Qələbəmizi şərtləndirən amillərdən, müasir müstəqil Azərbaycana davamlı uğurlar qazandıran Heydər Əliyev yolundan geniş bəhs edərək, bu fonda perspektivləri açıqladı. Prezident dedi ki, Yeni Azərbaycan Partiyası nəinki Azərbaycanın, Cənubi Qafqazın ən böyük siyasi partiyasıdır. Yeni Azərbaycan Partiyası bundan sonra da ölkəmizdə gedən bütün proseslərin mərkəzində olacaq.
M.Həsənov bildirib ki, YAP Sədri İlham Əliyev VII qurultayda partiyanın yeni Proqramının hazırlanması və təsdiqi ilə bağlı tapşırıqlar verib: “Ötən ilin sonunda YAP İdarə Heyətinin qərarı ilə təsdiqlənən, demokratik dəyərlərə və milli maraqlara əsaslanan, müasir yanaşma və metodları özündə ehtiva edən partiyanın yeni Proqramında partiyadaxili münasibətləri səciyyələndirən əsas meyarlar öz əksini tapıb. Peşəkarlıq, işgüzar münasibətlər, şəxsi inkişaf, sağlam rəqabət, milli dəyərlər, innovativ inkişaf və kreativlik, elmilik və müasirlik kimi amillər önə çəkilir. Partiya hər zaman cəmiyyətdə yeniliyin və müasirliyin tərəfdarı, təşəbbüskarı kimi çıxış edir”.
Deputat vurğulayıb ki, Proqramda YAP-ın fəaliyyətinin növbəti strateji hədəfləri müəyyən edilib. Heydər Əliyev irsinin təbliği və təşviqi, güclü iqtisadiyyat və davamlı inkişaf, inklüziv cəmiyyət, ədalətli sosial təminat və insan kapitalının inkişafı, şəffaflığın artırılması, vətəndaş cəmiyyətinin inkişafı, Azərbaycan dili və dünya azərbaycanlılarının həmrəyliyi, mədəni irsin və milli-mənəvi dəyərlərin qorunması, vətəndaş həmrəyliyinin təminatı, milli maraqlar və xarici siyasət, ordu quruculuğu, işğaldan azad olunmuş ərazilərə Böyük Qayıdış əsas hədəflərdir. Bu günümüzün çağırışlarından biri məhz işğaldan azad edilmiş ərazilərimizdə bərpa və quruculuq işlərini müasir tələblər əsasında həyata keçirmək, soydaşlarımızın Böyük Qayıdışını təmin etməkdir. Yeni Azərbaycan Partiyasının yeni Proqramında partiyanın bu prosesə dəstəyi əsaslı şəkildə qeyd olunur. Ölkəmizdə görülən bütün işlərdə fəal iştirak edən, hər zaman ölkə vətəndaşlarının istəklərini ifadə edərək onların yüksək rifah şəraitində yaşayışı üçün bütün zəruri addımların atılmasında həm maraqlı olan, həm də təşəbbüslər irəli sürən Yeni Azərbaycan Partiyası 30 ilə yaxın doğma yurd-yuvasından qaçqın və məcburi köçkün düşmüş soydaşlarımızın Böyük Qayıdışına öz töhfələrini verməyə çalışır. Ümumilikdə, YAP-ın fəaliyyətinin hədəfləri milli maraqların qorunmasına, Azərbaycan dövlətinin dayanıqlı inkişafına, beynəlxalq münasibətlər sistemində nüfuzunun artırılmasına xidmət edir.
“Yeni Proqramın “Müzəffər Liderlə Azərbaycanı yeni zirvələrə aparan güclü partiya” fəslində qeyd olunduğu kimi, partiyanın xalqımızın maraqlarına söykənən fəaliyyəti ölkəmizin bütün sahələrdə davamlı inkişafını təmin edir”, - deyən Malik Həsənov bildirib ki, “Biz birlikdə güclüyük!” devizi altında təsdiqlənən yeni Proqram özündə bütün məqamları ehtiva edir: “Bu deviz Azərbaycan dövlətinin, xalqının gələcəyinə yönələn bütün addımların mahiyyətində dayanır. 44 günlük İkinci Qarabağ müharibəsinin ilk günündə bu çağırışı edərək “Dəmir yumruq” kimi birləşdik, dünyaya birliyimizi, məğrur, yenilməz xalq olduğumuzu nümayiş etdirdik. Tarixi Qələbəmizdə bu birliyimizin rolu böyükdür. İki ildən artıqdır dünyanı bürüyən koronavirus infeksiyasına qarşı mübarizə tədbirlərinə başlayanda da “Biz birlikdə güclüyük!” dedik və onun müsbət nəticələri göz önündədir. Ölkəmizin hər bir uğurunda öz rolu, payı olan Yeni Azərbaycan Partiyası hər zaman monolitliyi, sözlə əməl birliyi ilə diqqətdədir, birgə səylərin göstərilməsi ilə hədəflərə yüksək səviyyədə nail olur.”
Deputat qeyd edib ki, YAP-ın ümumxalq partiyası olması onu gələcəkdə də aparıcı siyasi qüvvə kimi gücləndirən meyardır: “Partiyada cəmiyyətin müxtəlif təbəqələrinin nümayəndələrinin geniş şəkildə təmsil olunması xalqımızın YAP-a böyük etimadının ifadəsidir. Əsas hədəflərindən biri Heydər Əliyev irsinin təbliği və təşviqi olan, dövlət siyasətinin həyata keçirilməsində, ölkəmizdə yeni siyasi konfiqurasiyanın yaranmasında və partiyalararası dialoqun möhkəmlənməsində fəal iştirak edən, beynəlxalq əlaqələrini genişləndirməklə Azərbaycan həqiqətlərinin təbliğinə, ölkələr arasında münasibətlərin inkişafına böyük töhfələr verən YAP-ın cəmiyyətdə mövqeyi günbəgün möhkəmlənməkdədir. YAP “Biz birlikdə güclüyük!” devizi altında daha möhtəşəm uğurlara və qələbələrə doğru inamla irəliləyir”.
Bölmənin digər xəbərləri
