MALİYYƏ NAZİRLİYİ MƏTBUAT XİDMƏTİNİN MƏLUMATI
Maliyyə Nazirliyi bildirir ki, Azərbaycan Respublikası Prezidentinin 28 noyabr 2000-ci il tarixli Fərmanının icrası ilə əlaqədar Nazirlər Kabinetinin müvafiq qərarına əsasən, Dövlət daxili uduşlu istiqrazları 2001-ci il sentyabrın 1-dən dövriyyəyə buraxılmışdır.
Dövlət təminatlı istiqrazların ümumi məbləği 40 milyard manat olmaqla, nominal dəyəri 20 min və 40 min manatdir.
İstiqrazların dövriyyə müddəti 2011-ci il yanvarın 1-də başa çatacaqdır.
İstiqrazlar üzrə gəlirlər buraxılışın orta hesabla illik 12 faizi həcmində udus şəklində ödənilir. Uduşların məbləği 40 min manatdan 50 milyon manata qədərdir. İstiqrazların könüllülük əsasında nağd yolla satılıb alınması və onlar üzrə uduşların ödənilməsi Birləşmiş Universal Səhmdar Bankının idarə, filial və kassaları tərəfindən həyata keçiriləcəkdir.
İldə 8 uduş tirajının keçirilməsi nəzərdə tutulmuşdur. Uduş tirajının tarixi, vaxtı və keçiriləcəyi ünvan barədə mətbuat vasitəsilə məlumat veriləcək və uduş tirajının cədvəli rəsmi qəzetlərdə dərc olunacaqdır.
İlk uduş tirajı 2001-ci il sentyabrın 30-da Bakı şəhərində keçiriləcəkdir.
Bölmənin digər xəbərləri
