İQTİSADİYYAT
MALİYYƏ NAZİRLİYİ MƏTBUAT XİDMƏTİNİN MƏLUMATI
Respublikamızda sığorta bazarının inkişaf etdirilməsi, sığortalılara etibarlı təminat yaradılması, bu sahədə göstərilən xidmətlərin keyfiyyətinin yüksəldilməsi, habelə sığortaya dövlət nəzarətinin gücləndirilməsi istiqamətində Azərbaycan Respublikası Maliyyə Nazirliyi məqsədyönlü tədbirlərin həyata keçirilməsini davam etdirir.
Belə ki, “Neftqazsığorta” Sığorta Şirkətinin fəaliyyətinin yoxlanılması zamanı ciddi qanun və maliyyə pozuntuları, o cümlədən külli miqdarda vergidən yayınma faktlarının aşkar olunması ilə əlaqədar şirkətə sığorta fəaliyyətinə verilmiş xüsusi razılıq (lisenziya) qanunvericiliyə uyğun olaraq nazirlik tərəfindən ləğv edilmişdir.
Eyni zamanda “Şəfəq” Tibbi Sığorta Şirkətinin lisenziyası, şirkətin təsisçilərinin ümumi yığıncağının qərarına və müraciətinə əsasən Maliyyə Nazirliyinin müvafiq əmri ilə ləğv olunmuş, “Kaspian İnşurans Ko Ltd” Məhdud Məsuliyyətli Müəssisəsi isə fəaliyyət müddətinin başa çatması ilə bağlı olaraq lisenziyası etibarsız sayıldığından sığorta fəaliyyətini həyata keçirmək hüququnu itirmişdir.