MASALLI RAYONU İCRA HAKİMİYYƏTİNİN BAŞÇISI QƏZƏNFƏR AĞAYEVİN ÇIXIŞI
-Hörmətli cənab Prezident!
Hörmətli Avropa Olimpiya Komitəsinin prezidenti cənab Patrik Hikey!
Əziz qonaqlar!
Sizi bütün masallılılar adından salamlayır və rayonumuza “Xoş gəlmisiniz!” deyirik.
Bu gün müasir və möhtəşəm olimpiya kompleksinin açılışında Sizin iştirakınız bütün masallılıların, o cümlədən rayonun 60 minə yaxın gəncinin hədsiz sevincinə səbəb olmuşdur.
Möhtərəm cənab Prezident, Siz qonşu Lənkəranda olimpiya kompleksinin açılışından sonra Masallıda hətta üzgüçülük hovuzu olacaq kompleksin tikiləcəyinə söz vermişdiniz. Xalqımız Sizi sözü ilə əməli bir olan ölkə rəhbəri kimi tanıyır. İki il öncə Sizin təməlini qoyduğunuz və tikintisinin gedişi ilə şəxsən maraqlandığınız Olimpiya İdman Kompleksi rayonumuza xüsusi gözəllik və yaraşıq gətirmişdir. Siz Milli Olimpiya Komitəsinin prezidenti seçiləndən sonra ölkəmizdə idmana dövlət qayğısı daha da artmış, bir çox yerlərdə yeni idman kompleksləri tikilmişdir. Azərbaycan idmanının inkişafında yeni dövr başlamışdır. İndi ölkəmizin hər yerində gənc nəsildə idmana böyük həvəs yaranmışdır. Qısa müddət ərzində idmançılarımızın Olimpiya yarışlarında, dünya və Avropa çempionatlarında, müxtəlif beynəlxalq turnirlərdə əldə etdikləri uğurlar bunun əyani sübutudur. Azərbaycan idmanının dünyada şöhrətlənməsində Masallı idmançılarının da payı vardır. Belə ki, rayonumuzun yetirmələri arasında Olimpiya yarışlarının iştirakçıları, beynəlxalq turnirlərin qalibləri, dünya və Avropa çempionları olmuşdur.
Ulu öndərimiz Heydər Əliyev demişdir ki, xalqımızın sağlamlığını təmin etmək dövlətimizin ali məqsədidir. Siz bu ali məqsəd naminə Azərbaycan gəncinin sağlam və savadlı gələcəyini təmin edirsiniz. Sizin tapşırığınızla həm respublikamızda, o cümlədən bizim rayonumuzda müasir müalicə-diaqnostika mərkəzləri və təhsil müəssisələri inşa edilir. Son üç ildə rayonumuzda 7 yeni məktəb binası tikilmişdir. Bunlardan 3-ü Heydər Əliyev Fondunun həyata keçirdiyi “Yeniləşən Azərbaycana yeni məktəb” proqramı çərçivəsində tikilib istifadəyə verilmişdir. Ümummilli liderimiz Heydər Əliyevin xalqımızın gələcək rifahı naminə başladığı sosial-iqtisadi islahatların Sizin tərəfinizdən uğurla davam etdirilməsi nəticəsində ölkəmiz iqtisadi inkişaf sürətinə görə dünyada birincilər sırasındadır.
Sizin qəbul etdiyiniz hər bir qərar, xalqımızın xoş və firavan sabahına hesablanmış regionların sosial-iqtisadi inkişafı Dövlət proqramı uğurla həyata keçirilir. Ölkəmizin hər yerində olduğu kimi, Masallı rayonunda da bu sahədə xeyli işlər görülmüşdür. Rayonda 9184 yeni iş yeri açılmışdır ki, bunun da 4095-i daimi iş yeridir. 520 nəfər turist qəbul etmək imkanına malik 25 turizm və istirahət mərkəzi yaradılmışdır. “İstisu” sanatoriyası əsaslı təmir edilmiş və 60-a yaxın yeni istirahət evi tikilmişdir. Rayonda 2 meyvə-tərəvəz emalı müəssisəsi, 6 kərpic zavodu, 1 mebel fabriki və 35-ə yaxın mebel sexi fəaliyyət göstərir. 2006-cı ildə ümumi məhsul istehsalı əvvəlki ilə nisbətən 8,4 faiz artmışdır. Respublikamızın həyata keçirilən sosial və mədəni proqramlara masallılılar da həvəslə qoşulmuşdur. Rayonda geniş miqyasda abadlıq, quruculuq işləri, yeni park və xiyabanlar salınması davam etdirilir. Yaxın vaxtlarda rayonumuzda tikiləcək beynəlxalq standartlara uyğun futbol stadionu təkcə Masallıda deyil, həm də regionda futbolun inkişafına böyük təkan verəcəkdir.
Cənab Prezident, bizə hədiyyə etdiyiniz bu Olimpiya İdman Kompleksi respublikamızda indiyədək tikilmiş komplekslərin ən müasiridir. Biz əminik ki, bu gün istifadəyə veriləcək bu möhtəşəm idman kompleksində Azərbaycanı dünya və Olimpiya yarışlarında layiqincə təmsil edəcək yeni nəsil idmançılar yetişəcəkdir. Bu yüksək qayğıya görə bir daha Sizə öz dərin minnətdarlığımı bildirirəm.
Möhtərəm cənab Prezident!
İcazə verin, Sizi əmin edim ki, masallılılar həmişə olduğu kimi, bundan sonra da xalqımızın firavanlığı, Vətənimizin tərəqqisi naminə həyata keçirdiyiniz bütün proqramlarda yaxından iştirak edəcək, Sizin ətrafınızda sıx birləşəcək, həmişə Sizinlə olacaqlar.
Bölmənin digər xəbərləri
