REGİONLAR
Masallıda “Nə? Harada? Nə zaman?” oyunu üzrə intellektual bilik yarışı keçirilib
Masallı, 3 noyabr, İlkin Adıyev, AZƏRTAC
Masallı rayon Heydər Əliyev Mərkəzində “Şuşa İli”nə və 8 Noyabr - Zəfər Gününə həsr edilən “Şuşa - Qafqazın sənət məbədi” layihəsi çərçivəsində “Nə? Harada? Nə zaman?” oyunu üzrə intellektual bilik yarışı təşkil olunub.
AZƏRTAC-ın bölgə müxbiri xəbər verir ki, Masallı rayon Heydər Əliyev Mərkəzinin və Masallı Dövlət Regional Kollecinin birgə təşkilatçılığı ilə keçirilən yarışda kollecin tələbələrindən ibarət 6 komanda iştirak edib.
Əvvəlcə ulu öndər Heydər Əliyevin və Azərbaycanın müstəqilliyi, suverenliyi, ərazi bütövlüyü uğrunda şəhid olmuş qəhrəmanlarımızın əziz xatirəsi bir dəqiqəlik sükutla yad olunub.
Masallı rayon Heydər Əliyev Mərkəzinin əməkdaşı Gülcahan Vəkilzadənin moderatorluğu ilə keçirilən yarışda Ulu Öndərin həyat və fəaliyyəti, mədəniyyətimizin paytaxtı Şuşa şəhəri, hərb tariximiz, döyüş sənəti, məntiq, həmçinin qəhrəmanlarımızla bağlı müxtəlif sahələri əhatə edən suallar səsləndirilib.
İştirakçıların cavabları yarışda münsiflər kimi iştirak edən Masallı rayon Heydər Əliyev Mərkəzinin direktoru Dilbər İbayeva, Masallı Dövlət Regional Kollecinin tərbiyə üzrə direktor müavini Dilarə Hüseynova və Masallı Tarix-Diyarşünaslıq Muzeyinin direktoru Əntiqə Tağıyeva tərəfindən qiymətləndirilib.
Nəticələrə əsasən “Zirvə” komandası qalib olub. Yekunda bütün komandalara yarışda fəal iştiraklarına görə “Təşəkkürnamə”lər təqdim edilib. Qalib komanda isə Fəxri fərmanla təltif olunub.