Masallıda ümummilli lider Heydər Əliyevə həsr olunmuş onlayn konfrans keçirilib
Masallı, 11 dekabr, Bağır Əliyev, AZƏRTAC
Dekabrın 11-də Masallı Rayon Gənclər və İdman İdarəsinin təşkilatçılığı ilə ümummilli lider Heydər Əliyevin anım gününə həsr olunmuş onlayn konfrans keçirilib.
AZƏRTAC-ın bölgə müxbiri xəbər verir ki, tədbir iştirakçıları əvvəlcə ulu öndər Heydər Əliyevin və Vətən müharibəsində şəhid olanların xatirəsini bir dəqiqəlik sükutla yad ediblər.
Onlayn konfransda çıxış edən Masallı Rayon Gənclər və İdman İdarəsinin rəisi Camal Manafov bildirib ki, müasir müstəqil Azərbaycan dövlətinin memarı və qurucusu, dünya şöhrətli siyasi xadim, türk dünyasının böyük oğlu, xalqımızın ümummilli lideri Heydər Əliyev hələ sağlığında tarixin yaddaşında əbədiləşib.
“Ulu öndər Heydər Əliyev şah əsəri olan müstəqil Azərbaycanı bütün dünyada şərəf və ləyaqətlə təmsil edib”, - deyən C.Manafov vurğulayıb ki, xalqımızın milli özünütəsdiqinin parlaq ifadəsinə çevrilmiş müstəqil dövlətçilik konsepsiyası məhz Heydər Əliyevin adı ilə bağlıdır.
Ümummilli lider Heydər Əliyevin əsasını qoyduğu və bu gün Azərbaycan Prezidenti İlham Əliyev tərəfindən uğurla davam etdirilən siyasət nəticəsində ölkəmizin qazandığı nailiyyətlər gündən-günə artmaqda davam edir.
Onlayn tədbirdə Masallı Rayon Gənclər və İdman İdarəsinin nəzdində Uşaq Gənclər İdman Məktəbinin məşqçi-müəllimi, Əməkdar məşqçi Xanağa Quliyev çıxışında qeyd edib ki, ulu öndər Heydər Əliyev daim idmançıların cəmiyyət həyatındakı rolunun artmasına, özlərinə layiqli yer tutmalarına xüsusilə diqqət yetirirdi. Dövlətin idman siyasətinin həyata keçirilməsi üçün 1994-cü ildə ölkəmizdə Gənclər və İdman Nazirliyi yaradıldı. Azərbaycanda idmanın kütləviliyinin təmin olunması, bu sahənin tərəqqisi, dünya şöhrətli idmançıların hazırlanması ilə bağlı görülən işlər böyük vüsət aldı.
İdmanı, bədən tərbiyəsini xalqın sağlamlığı ilə bağlı olan mühüm sosial sahə adlandıran Ümummilli Lider dövlətimizin dünyada tanınmasında, nüfuzunun yüksəlməsində idmanın mühüm rolunu qeyd edərək deyirdi: “Azərbaycan bayrağı dünyada, demək olar ki, iki dəfə qaldırılır. Bu, bir Azərbaycanın dövlət başçısı hər hansı ölkəyə gələrkən və bir də idmançılarımız beynəlxalq yarışlarda çempion adını qazanarkən baş verir. Azərbaycan himni səslənir, dövlət bayrağı qaldırılır".
Heydər Əliyevin müdrik rəhbərliyi, uzaqgörən siyasəti sayəsində Azərbaycan qısa zamanda mühüm nailiyyətlər qazandı. Eləcə də bədən tərbiyəsi və idman sahəsində də möhtəşəm qələbələr əldə edildi.
Onlayn konfransda, həmçinin Güllütəpə kənd tam orta məktəbinin fəal gənc müəllimi Qoşqar Səmədov, Qızılağac kənd tam orta məktəbinin tarix müəllimi Sərxan Əhmədov çıxış ediblər. Çıxış edənlər ümummilli lider Heydər Əliyevin Azərbaycanın dövlət müstəqilliyinin qazanılmasında və möhkəmləndirilməsində müstəsna rolundan danışaraq, Ulu Öndərin yürütdüyü uzaqgörən daxili və xarici siyasət nəticəsində ölkəmizin artıq dünyanın lider dövlətlərindən, regionun iqtisadi və siyasi mərkəzlərindən biri olduğunu diqqətə çatdırıblar.
Diqqətə çatdırılıb ki, Ulu Öndərin layiqli davamçısı Prezident İlham Əliyevin rəhbərliyi ilə sabaha inamla addımlayan Azərbaycan 30 ildir işğal altında qalan torpaqlarını yağı düşməndən azad edib. Müzəffər Ali Baş Komandan İlham Əliyevin rəhbərliyi ilə “Dəmir yumruq” adlı əks-hücum əməliyyatı nəticəsində ordumuz Qarabağ torpaqlarını yağı düşməndən təmizləyib, ərazi bütövlüyümüzü bərpa edib.
Bölmənin digər xəbərləri
