MDB İCRAİYYƏ KOMİTƏSİNİN SƏDRİ–İCRAÇI KATİBİ VLADİMİR RUŞAYLO BAKIYA GƏLMİŞDİR
Heydər Əliyev adına beynəlxalq hava limanında V.Ruşaylonu və onu müşayiət edən şəxsləri Azərbaycan Baş nazirinin birinci müavini Abbas Abbasov və digər rəsmi şəxslər qarşıladılar.
Vladimir Ruşaylo ölkəmizə səfərinin məqsədləri barədə jurnalistlərin suallarına cavab verərək dedi ki, noyabrın 6-da Azərbaycanda parlament seçkiləri keçiriləcək və MDB Dövlət Başçıları Şurasının qərarına əsasən, seçkilərə bir ay qalmış müşahidəçilər missiyası yaradılır və fəaliyyətə başlayır. Biz oktyabrın 6-da Bakıda seçkilərə müşahidə üzrə missiyanın qərargahını açmağı planlaşdırırıq. Müşahidəçilər missiyası MDB ölkələrinin hesabına yaradılır. Biz Birlik ölkələrinə məktub göndərərək, hər dövlətdən nə qədər müşahidəçi olacağını göstərmişik.
Vladimir Ruşaylo Ermənistan-Azərbaycan, Dağlıq Qarabağ münaqişəsinin həllində MDB İcraiyyə Komitəsinin rolu barədə suala cavabında bildirdi ki, hüquqi bazaya uyğun olaraq, sülhyaratma fəaliyyəti MDB-nin fəaliyyət sahəsinə daxildir. Lakin bu münaqişə ilə, əsasən ATƏT-in Minsk qrupu məşğul olur. İşgüzar məsləhətləşmələrdə biz də iştirak edirik.
Bölmənin digər xəbərləri
