MDB-nin qərargahında Daimi Səlahiyyətli Nümayəndələr Şurasının iclası keçiriləcək
Minsk, 14 iyun, AZƏRTAC
İyunun 16-da Minskdə, MDB İcraiyyə Komitəsində Birliyin nizamnamə və digər orqanları yanında Daimi Səlahiyyətli Nümayəndələr Şurasının (DSNŞ) növbəti iclası keçiriləcək. Bu barədə AZƏRTAC-a MDB-nin Minskdəki qərargahından məlumat veriblər.
İclasda MDB İcraiyyə Komitəsinin sədri - icraçı katib Sergey Lebedev iştirak edəcək.
İyunun 7-də Bişkekdə keçirilən və Birlik ölkələrinin qarşılıqlı inteqrasiya fəaliyyətinin müxtəlif sahələrini əhatə edən 22 sənədin qəbul olunduğu MDB Hökumət Başçıları Şurasının (HBŞ) iclasına yekun vurmaq planlaşdırılır.
DSNŞ-ın üzvləri MDB Dövlət Başçıları Şurasının (DBŞ), Hökumət Başçıları Şurasının, Xarici İşlər Nazirləri Şurasının və İqtisadi Şuranın prosedura qaydalarına və MDB Dövlət Başçıları Şurasının Birliyin müasir reallıqlara adaptasiyası haqqında qərarının layihəsinə dəyişikliklərin edilməsinin məqsədəuyğunluğunu müzakirə edəcəklər.
Bundan əlavə, Belarus Milli Məclisinin Nümayəndələr Palatası deputatlarının seçkilərində MDB-dən olan müşahidəçilər missiyasının başçısının namizədliyini razılaşdırmaq planlaşdırılır.
Zeynal Ağazadə
AZƏRTAC_ın xüsusi müxbiri
Minsk
Bölmənin digər xəbərləri
