MDB ÖLKƏLƏRİ İLƏ QARŞILIQLI İQTİSADİ YAXINLAŞMA XƏTTİ RUSİYANIN RƏSMİ SİYASƏTİDİR
V.Xristenkonun RF Sənaye və Energetika Nazirliyinin mətbuat xidməti tərəfindən yayılmış bəyanatında deyilir ki, Rusiya Birlik dövlətlərinin milli mənafelər zonasıdır və bütün MDB məkanında iqtisadi tərəqqiyə maraq göstərir.
V.Xristenkonun fikrincə, MDB dövlətlərinin infrastrukturu əvvəlcədən vahid infrastruktur kimi yaradılmış və MDB-də istehsal olunan malların çoxu üçün qonşuların bazarları, əslində, indi də vahid istehlak bazarıdır. İttifaq dağıldıqdan sonra yaranmış və hazırda fəaliyyət göstərən inteqrasiya birlikləri, ilk növbədə, MDB dövlətləri arasında əmtəə mübadiləsini sadələşdirmək məqsədi daşıyır.
V.Xristenko əmindir ki, Birliyin xüsusilə əhəmiyyətli iqtisadi potensiala malik olan dövlətləri ilə vahid iqtisadi məkanın yaradılması Rusiyaya və digər dövlətlərə nəqliyyat, energetika, ticarət, kapital və işçi qüvvəsi kimi sahələrdə dünya infrastrukturlarına qoşulmağa imkan verəcəkdir. O, Rusiya, Belarus, Ukrayna və Qazaxıstanın vahid iqtisadi məkanının yaradılmasını buna nümunə göstərərək demişdir ki, bu, dünyanın ən iri sənaye müəssisələri ilə rəqabətə girməyə imkan verəcəkdir.
Viktor Xristenko demişdir: “Rusiyanın intensiv inkişafının yeganə yolu real, institusional cəhətdən möhkəmlənmiş iqtisadi inteqrasiyadır”.
Bölmənin digər xəbərləri
