CƏMİYYƏT
MDB PARLAMENTLƏRARASI ASSAMBLEYANIN İCLASINDA
Xəbər verildiyi kimi, Milli Məclisin sədri Murtuz Ələsgərov başda olmaqla parlament nümayəndə heyəti hazırda Sankt-Peterburqda səfərdədir və MDB Parlamentlərarası Assambleyanın (MDB PAA) növbəti iclasında və bu qurumla Avropa Şurası Parlament Assambleyasının birgə tədbirlərində iştirak edir.
AZƏRTAC-ın Rusiya Federasiyasındakı xüsusi müxbiri Asya Hacızadənin Sankt-Peterburqdan verdiyi xəbərə görə, martın 25-də Rusiya Federal Məclisinin başçısı Sergey Mironovun sədrliyi ilə MDB Parlamentlərarası Assambleyanın iclası açılmışdır. Gündəliyə MDB PAA və AŞPA arasında beşillik əməkdaşlığa yekun vurulması ilə bağlı məsələlər, gələcək qarşılıqlı əlaqələrin perspektivləri, habelə MDB PAA-nın 10 illik yubileyinin keçirilməsinə dair tədbirlər planı daxil edilmişdir. Bununla yanaşı, iclasda MDB PAA ilə AŞPA-nın birgə tədbirinə - terrorizmlə mübarizə üzrə parlamentlərarası foruma hazırlıq məsələsi müzakirə olunmuşdur.
Martın 27-28-də Sankt-Peterburqda keçiriləcək forumda dünyanın müxtəlif ölkələrindən 900-ə yaxın parlament üzvü iştirak edəcəkdir.
Sankt-Peterburq forumunun yekunlarına əsasən MDB PAA və AŞPA üzvü olan ölkələrin qanunvericilik orqanlarının terrorizmlə mübarizə sahəsində əməkdaşlığı haqqında yekun sənəd qəbul olunacaqdır.
Martın 25-də Azərbaycan deputatları MDB PAA-nın müdafiə və təhlükəsizlik, hüquqi məsələlər, siyasi məsələlər və beynəlxalq əməkdaşlıq, sosial siyasət və insan hüquqları daimi komissiyalarının işində də iştirak etmişlər.