Mədəniyyət Nazirliyi yaradıcı şəxsləri ResiliArt hərəkatına qoşulmağa çağırır
Bakı, 18 aprel, AZƏRTAC
Mədəniyyət Nazirliyi və “Kreativ Azərbaycan” portalı (creative.az) ölkəmizə olan bütün incəsənət nümayəndələrini, yaradıcı şəxsləri UNESCO-nun ResiliArt hərəkatına qoşulmağa və aktiv iştiraka dəvət edir.
Nazirlikdən AZƏRTAC-a bildirilib ki, UNESCO yeni bir hərəkata - ResiliArt (Dözümlü İncəsənət) hərəkatına başlayır. ResiliArt hərəkatı mədəniyyət sahəsinin aparıcı professionalları ilə eksklüziv qlobal müzakirə təşkil etməklə yaradıcı sahələrin böhran şəraitində indiki vəziyyətinə işıq salmaq, eləcə də sosial media vasitəsilə həm tanınmış, həm də yetişməkdə olan incəsənət adamlarının səsini və təcrübələrini yaymaq məqsədi daşıyır.
Ümumilikdə bu hərəkat COVID-19 pandemiyasının bu sektora hərtərəfli təsiri barədə məlumatlılıq səviyyəsini artırmaq və incəsənət adamlarını bu böhran zamanı və böhrandan sonra da dəstəkləməyi hədəfləyir.
Mədəniyyət sənayesi mütəxəssisləri hərəkata qoşulmağa və ResiliArt debatlarını öz bölgələrində təşkil etməyə dəvət edilir. Bütün mədəniyyət dəyər zəncirinə vurulmuş bu zərbənin yaradıcı iqtisadiyyat üzərində uzunmüddətli təsirləri olacaqdır. ResiliArt hərəkatının məqsədi də pandemiya bitdikdən sonra uzun müddət müzakirələrin, məlumat mübadiləsinin və ictimai vəkillik səylərinin davamlılığını təmin etməkdir.
Bölmənin digər xəbərləri
