Media: Marko Rubio Rusiyaya qarşı yeni sanksiyaların tərəfdarıdır
Bakı, 23 may, AZƏRTAC
ABŞ Dövlət katibi Marko Rubio Rusiyaya qarşı respublikaçı senator Lindsi Qremin irəli sürdüyü yeni sanksiyaların tətbiqi ilə bağlı qanun layihəsinin tərəfdarıdır.
AZƏRTAC xəbər verir ki, “New Lines” jurnalı bu barədə ABŞ Dövlət Departamentinə yaxın olan mənbəyə istinadla məlumat yayıb.
“Marko Rubio, demək olar ki, hər gün sanksiyalar məsələsini gündəmə gətirir. O, Senatda veto üçün çoxluğa malik Lindsi Qremin təklif etdiyi qanun layihəsinin qəbul olunmasına çalışır. Qanun layihəsi təsdiq olunacağı təqdirdə Moskva ilə münasibətlərin bərpası cəhdlərinə son qoyacaq”, - deyə nəşrin həmsöhbəti bildirib. O, həmçinin ABŞ Prezidenti Donald Trampın qanun layihəsinin əleyhinə olduğunu vurğulayıb.
Aprelin əvvəlində hər iki partiyadan olan 50 amerikalı senator Vaşinqtonun Ukrayna münaqişəsinin həlli ilə bağlı təkliflərinin Moskva tərəfindən rədd ediləcəyi təqdirdə Rusiyaya və onun ticarət tərəfdaşlarına qarşı ilkin və ikinci dərəcəli sanksiyaların qəbulu haqqında qanun layihəsi təqdim edib. Lindsi Qrem və Riçard Blumental tərəfindən təqdim edilən sənəd, həmçinin Rusiyadan neft, qaz və uran alan ölkələrin mallarına da 500 faizlik idxal rüsumunu nəzərdə tutur.
Bir müddət öncə “Axios” portalında dərc olunan məlumata görə, Donald Tramp rusiyalı həmkarı Vladimir Putinlə telefon danışığından sonra Avropa ölkələrinin liderlərinə və Ukraynanın dövlət başçısı Volodimir Zelenskiyə hələlik Moskvaya qarşı sanksiyalar tətbiq etmək niyyətində olmadığını deyib.
Xatırladaq ki, mayın 19-da ABŞ və Rusiya prezidentləri arasında iki saatdan çox davam edən telefon danışığı baş tutub. Bu, Donald Trampla Vladimir Putin arasında ilin əvvəlindən bəri üçüncü telefon danışığıdır.
Bölmənin digər xəbərləri
