Mehdiabad 5 nömrəli tam orta məktəbin şagirdləri dərs ilinə yeni məktəb binasında başlayıblar
Mehdiabad, 15 sentyabr, Ətrabə Rzayeva, AZƏRTAC
“Bilik günü”ndə Abşeron rayonunun təhsil ocaqlarında əsl bayram təntənəsi yaşanıb. Sentyabrın 15-də rayonun Mehdiabad qəsəbəsində ən müasir tələblər səviyyəsində inşa edilən və avadanlıqla təchiz olunan 5 nömrəli tam orta məktəbin açılışı olub.
AZƏRTAC xəbər verir ki, məktəbin binasının açılış mərasimində təhsil nazirinin müavini Məhəbbət Vəliyeva, Abşeron Rayon İcra Hakimiyyətinin başçısı İradə Gülməmmədova iştirak ediblər.
Yeni təhsil ocağının istifadəyə verilməsi mərasimi Azərbaycan dövlət himninin səsləndirilməsi ilə başlanıb.
Məktəbin direktoru Samirə Əkbərova rəhbərlik etdiyi kollektiv adından ölkə Prezidenti İlham Əliyevə dərin minnətdarlığını bildirib. Qeyd edilib ki, məktəb binasının Təhsil Nazirliyinin sifarişi ilə 2016-cı ildən başlanan inşası yüksək keyfiyyətlə aparılaraq başa çatdırılıb. 1200 şagirdin təhsil alması üçün nəzərdə tutulan üçmərtəbəli məktəbin ümumi ərazisi 1.17 hektardır. Burada keyfiyyətli təhsil almaq üçün bütün şərait yaradılıb.
Tədbirdə çıxış edən təhsil nazirinin müavini Məhəbbət Vəliyeva deyib: “Yeni tədris ilində Azərbaycan məktəblərində 1 milyon 592 min 317 şagird təhsil alacaq. Onlardan 165.780 nəfəri - birincilər ilk dəfə parta arxasında oturacaqlar. Bu gün Mehdiabad 5 nömrəli tam orta məktəbin müəllim və şagirdləri üçün əsl bayramdır. Onlar “Bilik günü”nü, yeni dərs ilini yeni məktəb binasında qeyd edirlər”. M.Vəliyeva ölkəmizdə təhsilə verilən önəmdən, təhsil ocaqlarının maddi-texniki bazasının qücləndirilməsinə yönəldilən mühüm tədbirlərdən danışıb. Bildirilib ki, artıq ölkədə yeni təhsil konsepsiyası formalaşıb və uğurla həyata keçirilir. Bu il 137 modul tipli məktəbin istifadəyə veriləcəyini qeyd edən nazir müavini son illərdə təhsilin maddi-texniki bazasının möhkəmləndirilməsinin dövlət siyasətinin prioritet istiqamətlərindən olduğunu vurğulayıb. Azərbaycanda yüzlərlə yeni məktəb binasının tikilməsi, mövcud olanların əsaslı surətdə yenidən qurulması nəhəng təhsil infrastrukturunun formalaşmasına geniş imkanlar açıb. M.Vəliyeva bütün bunların gənc nəslin savadlı və sağlam əqidəli, vətənpərvər ruhda formalaşmasına xidmət etdiyini diqqətə çatdırıb.
Təhsil nazirinin müavini pedaqoji kollektivi tədrisin keyfiyyətini yaxşılaşdırmağa, gəncləri milli ruhda tərbiyə etməyə, onları ulu öndər Heydər Əliyevin ideyalarına, azərbaycançılıq məfkurəsinə sadiq gənclər kimi yetişdirməyə səsləyib.
Abşeron Rayon İcra Hakimiyyətinin başçısı İradə Gülməmmədova pedaqoji kollektivi yeni dərs ili münasibətilə təbrik edərək onlara uğurlar diləyib. O, son illər respublikamızda, o cümlədən rayonda təhsilin səviyyəsinin yüksəldilməsinə, maddi-texniki bazasının möhkəmləndirilməsinə göstərilən dövlət qayğısından, Prezident İlham Əliyevin bu sahədə gördüyü ardıcıl tədbirlərdən, habelə Heydər Əliyev Fondunun xidmətlərindən ətraflı bəhs edib.
Vurğulayıb ki, 2017-2018-ci dərs ili məzunlarının ali məktəblərə qəbul göstəriciləri keçən illərə nisbətən yüksəlib. Belə ki, bu il 2060 məzun olub. Onlardan 59-u fərqlənmə attestatı alıb. 1754 məzun sənədlərini ali məktəbə qəbul komissiyasına təqdim edib. Abituriyentlərin 1306 nəfəri, yəni 74,4 faizi tələbə adını qazanıb. Ali məktəblərə qəbul imtahanlarında 600 və daha çox bal toplayan tələbələrin sayının artdığın bildirən İ.Gülməmmədova 95 nəfərin yüksək nəticə əldə etdiyini vurğulayıb. Xüsusilə qeyd edilib ki, rayonda üç ildir ardıcıl olaraq məzunlar ali məktəblərə qəbul zamanı 700 bal toplayırlar.
Çıxış edən valideynlər Abşeron rayonuna göstərdiyi diqqət və qayğıya görə Prezident İlham Əliyevə minnətdarlıqlarını bildiriblər.
Məktəb binasının açılışını ifadə edən qırmızı lent kəsilib, ilk zəng səslənib. Yeni məktəbdə yeni dərs ili başlanıb.
Sonra tədbir iştirakçıları yeni tədris ocağında yaradılan şəraitlə tanış olublar. Bildirilib ki, binada ümumilikdə 50 sinif otağı var. Məktəbdə 4 laboratoriya yaradılıb. Kompüterlə təchiz olunmuş İKT zalı, 112 yerlik yeməkxana, 74 yerlik kitabxana, 294 yerlik akt zalı, sahəsi 468 kvadratmetr olan idman zalı var. Məktəb binasının fasiləsiz içməli su ilə təminatı üçün nasosxana, su anbarı, həmçinin istilik sistemi, qazanxana və KTY-250 tipli transformator quraşdırılmış yarımstansiyası var. Məktəbin ərazisində geniş idman meydançası inşa olunub.
Bölmənin digər xəbərləri
