Məhkəmə-hüquq sistemində islahatların dərinləşdirilməsinin elmi-nəzəri təhlilinə dair dəyirmi masa keçirilib VİDEO
Bakı, 18 aprel, AZƏRTAC
Aprelin 18-də Azərbaycan Milli Elmlər Akademiyasının (AMEA) Hüquq və İnsan Haqları İnstitutunda ədalət mühakiməsinin keyfiyyətinin və səmərəliliyinin artırılması məqsədilə Prezident İlham Əliyevin 2019-cu il aprelin 3-də imzaladığı “Məhkəmə-hüquq sistemində islahatların dərinləşdirilməsi haqqında” Fərmanın elmi-nəzəri təhlili” mövzusunda dəyirmi masa təşkil olunub.
AZƏRTAC xəbər verir ki, tədbiri giriş sözü ilə açan Hüquq və İnsan Haqları İnstitutunun direktoru, Milli Məclisin deputatı, hüquq elmləri doktoru, professor Aytən Mustafazadə bu Fərmanın ölkəmizin davamlı tərəqqisinin təmin edilməsi üçün məhkəmə-hüquq sisteminin inkişafında yeni mərhələnin başlanacağına və bu sahədə islahatların dərinləşəcəyinə böyük ümid yaratdığını qeyd edib. O bildirib ki, AMEA-nın Hüquq və İnsan Haqları İnstitutunun əsas məqsədi hüquq, insan hüquq və azadlıqları problemlərinə dair elmi-tədqiqat işlərinin aparılması, elmi tövsiyələrin hazırlanması və bu sahədə hüquqi biliklərin dərinləşdirilməsini təmin etməkdən ibarətdir. Məhz buna görə məlum sənədin elmi-nəzəri təhlilinə ehtiyac var.
Prezident İlham Əliyevin müvafiq Fərmanının giriş hissəsində bildirilir ki, müasir dövrün tələblərinə cavab verən, cəmiyyətdə yüksək nüfuza malik ədalət mühakiməsinin formalaşdırılması prosesini sürətləndirmək məqsədilə məhkəməyə müraciət imkanları daha da genişləndirilməli, məhkəmələrin fəaliyyətində şəffaflıq artırılmalı, məhkəmə icraatının effektivliyi yüksəldilməli, məhkəmə qərarlarının tam və vaxtında icra edilməsi təmin olunmalı, süründürməçiliyin və digər neqativ halların aradan qaldırılması üçün görülən tədbirlər gücləndirilməlidir. Eyni zamanda, ədalət mühakiməsi mexanizmlərinin effektiv fəaliyyətinin təmin edilməsi üçün hakim və məhkəmə aparatı işçilərinin sosial müdafiəsi daha da yaxşılaşdırılmalı, müvafiq infrastrukturun yenilənməsi işləri davam etdirilməli, məhkəmə icraatında müasir informasiya texnologiyalarının tətbiqinin üstünlüklərindən hərtərəfli istifadə edilməli, digər mühüm məsələlər həll olunmalıdır. Bu Fərman dövlətimizin başçısının daim xalqın qayğısına qaldığını, ölkənin inkişafı, sahibkarlığın güclənməsi, qeyri-neft sektorunun inkişafına, insan kapitalına və bütün sahələrdə islahatların aparılmasına maraqlı olmasının göstəricisidir.
İnstitutun elmi işlər üzrə direktor müavini, hüquq elmləri doktoru, professor Nazim Cəfərli çıxışında qeyd edib ki, bu gün Azərbaycanın məhkəmə-hüquq sistemində islahatlar kompleks şəkildə aparılır, bu sahədə ciddi problemlərimiz yoxdur. Amma zamanın tələbinə uyğun olaraq islahatların dərinləşdirilməsinə ehtiyac var.
“Elektron məhkəmələr” mövzusunda çıxış edən Hüquq və İnsan Haqları İnstitutunun beynəlxalq hüquq şöbəsinin müdiri, hüquq elmləri doktoru Ramin Qurbanov “Məhkəmə-hüquq sistemində islahatların dərinləşdirilməsi haqqında” Fərmanın imzalanmasının əsasında iqtisadi faktorun dayandığını qeyd edib.
R.Qurbanov Azərbaycanda elektron məhkəmə sistemi haqqında geniş məlumat verib. O, elektron məhkəmələrin yarandığı dövrdəki və hazırkı vəziyyətini müqayisəli şəkildə təhlil edib. Elektron məhkəmə sisteminin daha da təkmilləşdirilməsi üçün təkliflər irəli sürüb.
Hüquq üzrə fəlsəfə doktoru İlham Əliyev vurğulayıb ki, ölkədə həyata keçirilmiş məhkəmə-hüquq islahatları nəticəsində bu sahədə irəliləyişlərə nail olunub və məhkəmə-hüquq sistemi demokratik-hüquqi prinsiplər əsasında günümüzün tələblərinə və beynəlxalq standartlara uyğun olaraq təkmilləşdirilib. Hüquq normalarını tətbiq edən subyektlər kimi məhkəmələrin də fəaliyyəti günün tələblərinə uyğun dəyişməli və inkişaf etdirilməlidir. Məhkəmə sisteminin təkmilləşdirilməsi fasiləsiz proses olduğundan hər zaman aktualdır və bu məsələyə xüsusi diqqət yetirilməlidir. Bu baxımdan dövlətimizin başçısının müvafiq Fərmanının əhəmiyyəti böyükdür.
AMEA Hüquq və İnsan Haqları İnstitutunun mülki hüquq, mülki proses və sosial-iqtisadi hüquqlar şöbəsinin aparıcı elmi işçisi, hüquq üzrə fəlsəfə doktoru Nərmin Baxşiyeva çıxışında Prezident İlham Əliyevin “Məhkəmə-hüquq sistemində islahatların dərinləşdirilməsi haqqında” Fərmanının elmi-nəzəri təhlilinə dair inzibati məhkəmə icraatı ilə bağlı təkliflər verib.
Tədbirdə Fərmanın icrası ilə bağlı elmi yanaşmalar səsləndirilib, verilən təkliflər ətrafında geniş fikir mübadiləsi aparılıb, nəticə etibarilə Fərmanın ölkəmizin taleyüklü məsələlərinin həllində xüsusi önəm daşıyacağına əminlik ifadə olunub.
Dəyirmi masada Azərbaycan Respublikası Milli Məclisinin deputatları, alimlər, Ədliyyə Nazirliyinin Ədliyyə Akademiyasının, Baş Prokurorluğun Elm və Tədris Mərkəzinin nümayəndələri iştirak ediblər.
Bölmənin digər xəbərləri
