Məişət zorakılığı qurbanlarına hüquqi məlumatlar verilib
Bakı, 3 iyun, AZƏRTAC
Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi tərəfindən məişət zorakılığı qurbanlarının iştirakı ilə “İnsan hüquqları aylığı”na həsr olunmuş maarifləndirici görüşlər təşkil edilib.
Agentliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, keçirilən tədbirlərin məqsədi məişət zorakılığı qurbanlarının hüquqi savadlılığının artırılması, bu sahədə məlumatlılığın gücləndirilməsi, özünəinam hissinin inkişaf etdirilməsi və cəmiyyətə uğurlu inteqrasiyasına dəstək göstərilməsidir.
Həmin tədbirlər çərçivəsində iştirakçılara insan hüquqları, hüquqi müdafiə mexanizmləri, dövlət tərəfindən göstərilən sosial xidmətlər, eləcə də mövcud dəstək resursları barədə ətraflı məlumat verilib.
Həmçinin onların hüquqlarının müdafiəsi sahəsində məlumatlılığının artırılması, təhlükəsiz və müstəqil həyat bacarıqlarının formalaşdırılması ilə bağlı maarifləndirici söhbətlər aparılıb.
Görüşlər zamanı şəxsi sərhəd anlayışı, fiziki, emosional və sosial sərhədlərin əhəmiyyəti barədə də məlumat verilib.
Benefisiarlarla “yox” demək bacarığının formalaşdırılması, şəxsi toxunulmazlıq hüququnun təmin edilməsi və təhlükəsizlik bacarıqlarının inkişaf etdirilməsi mövzuları müzakirə olunub.
Bölmənin digər xəbərləri
