Meksikanın “Excelsior” qəzeti: “2015. Qanlı Yanvardan 25 il sonra”
Bakı, 20 yanvar, AZƏRTAC
Meksikanın “Excelsior” qəzetində “2015. Qanlı Yanvardan 25 il sonra” sərlövhəli məqalə dərc edilib.
Məqalədə Azərbaycan xalqının hər il 20 Yanvar faciəsi qurbanlarının xatirəsini ehtiramla yad etdiyi bildirilir. “Qanlı Yanvar” adı ilə tarixə düşən hadisələrin Azərbaycanda sovet hakimiyyətinə son qoyan bir qığılcım olduğu və bütün dünya azərbaycanlılarının yaddaşında Azərbaycan xalqına qarşı ən qəddar cinayətlərdən biri olaraq həkk edildiyi diqqətə çatdırılır.
Məqalədə sovet qoşunlarının 1990-cı il yanvarın 20-də Azərbaycanın paytaxtı Bakı şəhərinə yeridilməsi, aralarında uşaq, qadın və qocaların da olduğu yüzlərlə günahsız dinc sakinin qətlə yetirilməsi barədə məlumat verilir.
Qanlı Yanvar hadisələrinin “The Washington Post” qəzetində dərc olunan məqalədə və “Human Rights Watch” təşkilatı tərəfindən hazırlanmış hesabatda “ən qorxunc insan hüquqları pozuntusu hadisələri” kimi qeydə alındığı vurğulanır.
Məqalədə ərazisinin 20 faizinin qonşu Ermənistan tərəfindən işğal edilməsinə baxmayaraq, Azərbaycanın öz müstəqilliyini qoruyub saxladığı oxucuların diqqətinə çatdırılır.
Bölmənin digər xəbərləri
