Mərakeş mediası elektrik enerjisinin kəsilməsi fonunda Rabatın İspaniyaya “səxavətli jest”indən yazır
Bakı, 29 aprel, AZƏRTAC
Gecəyarısı Baş nazir Pedro Sançes üçüncü çıxışında ölkə tarixindəki ən miqyaslı elektrik enerjisi kəsilməsi zamanı İspaniyaya elektrik enerjisi tədarükünə görə Mərakeşə minnətdarlığını bildirib.
AZƏRTAC “La Razon” nəşrinə istinadla xəbər verir ki, Mərakeş Milli Elektrik Enerji və İçməli Su İdarəsi (ONEE) iki ölkə arasında mövcud sualtı elektrik xətti vasitəsilə İspaniyada elektrik enerjisi təchizatının bərpasında əməkdaşlıq edib.
Mərakeşin “Le360” və “Le Desk” mətbu orqanlarının istinad etdiyi mənbələrin məlumatına görə, İspaniyanın “Red Electrica” elektrik şəbəkəsi operatoru Mərakeş tərəfindən “Ferdiqua” və İspaniya tərəfindən “Tarifa” arasında əlaqənin aktivləşdirilməsini təsdiqləyib. Bu mənbələrin məlumatına görə, bu, ümumilikdə tranzit gücü 900 meqavat olan iki xətdir və onlar enerjinin çökməsinin Mərakeşə hər hansı təsirini istisna ediblər.
Mərakeş mütəmadi olaraq İspaniyadan elektrik enerjisi idxal etsə də (“Efe” xəbər agentliyinin məlumatına görə, ONEE 2024-cü ildə “Tarifə”dən 2537 gigavat-saat alıb ki, bu da əvvəlki ilə nisbətən 27 faiz çoxdur), bu dəfə Avropa qonşusuna yardım əlini uzadan məhz Şimali Afrika ölkəsi olub. Mərakeş mediası bu əməkdaşlıq jestini qeyd edərək, milli elektrik şəbəkəsi üçün kritik anda Mərakeşin sürətli reaksiyasını və həmrəyliyini tərifləyən Baş nazir Sançesin minnətdarlığını vurğulayıb.
Bölmənin digər xəbərləri
