Mərkəzi Bankın sədri: Banklararası dövriyyənin göstəricisi rekord həddədir
Bakı, 12 iyun, AZƏRTAC
Uçot dərəcəsinin işlənib hazırlanması çox mürəkkəb bir prosesdir. Burada bank sahiblərinin davranışı əsas məsələlərdəndir. Banklararası faiz dəhlizi uçot dərəcəsinə müsbət təsir edir.
AZƏRTAC xəbər verir ki, bunu Mərkəzi Bankın sədri Taleh Kazımov Milli Məclisin İqtisadi siyasət, sənaye və sahibkarlıq komitəsinin iyunun 12-də keçirilən iclasında deyib.
İnflyasiya məsələlərinə toxunan sədr bildirib ki, Mərkəzi Bankın aprel ayına olan göstəricilərinə görə inflyasiya 8,3 faiz təşkil edir. Realda isə bu rəqəm 5,3 faizdir. Bu, idxal olunan inflyasiyadır. İnflyasiyanın 12,8 faizinin 6 faiz bəndi ticarət tərəfdaşlarından idxal olunan inflyasiyadır.
Taleh Kazımov bildirib ki, inflyasiya 80 faiz idxal olunan məhsullara görədir.
Kənd təsərrüfatı mallarının istehsal və istehlakından danışan Mərkəzi Bankın sədri qeyd edib ki, bu sahə üzrə istehlakda inflyasiyanın 1,5 faiz olacağı proqnozlaşdırılır. İstehlak kreditlərinin bir qədər məhdudlaşdırılması inflyasiyanın 1,2 faiz aşağı düşməsinə səbəb olub.
Taleh Kazımov vurğulayıb ki, qarşıya qoyulan əsas məqsədlərdən biri də uçot dərəcəsinin effektivliyinin artırılmasıdır. Payız transmissiyasının zəif olduğunu diqqətə çatdıran sədr bildirib ki, ölkədə yeni pul siyasəti həyata keçirilib. “Biz, ilk növbədə, banklararası bazarın yaradımasına nail olduq. Artıq banklararası orta aylıq dövriyyə 3 milyardı ötüb və bu da rekord göstəricidir”, - deyə Taleh Kazımov qeyd edib.
Bölmənin digər xəbərləri
