Mərkəzləşdirilmiş Antivirus Sistemi vasitəsilə birinci yarımildə 2,8 milyon zərərverici virus bloklanıb
Bakı, 23 sentyabr, AZƏRTAC
Birinci yarımil ərzində dövlət qurumlarına yönləndirilmiş 2 milyon 808 min zərərverici virus bloklanıb.
AZƏRTAC xəbər verir ki, bunu Dövlət Qurumlarının İnformasiya Texnologiyaları rəhbərlərinin II Zirvə Toplantısında Azərbaycan Respublikası Xüsusi Rabitə və İnformasiya Təhlükəsizliyi Dövlət Xidmətinin (XRİTDX) idarə rəisi Tural Məmmədov “Görülən işlər, yeniliklər və gələcək planlar” mövzusunda çıxışında deyib.
Tural Məmmədov bildirib ki, dövlət qurumlarına XRİTDX müəyyən ildən bir bizim Antivirus Laboratoriyamızda zərərverici analiz laboratoriyamızda müxtəlif antivirus həlləri yoxlanılır və içindən ən yaxşıları seçilərək dövlət qurumlarına təqdim edilir. Dövlət qurumları bu antivirusdan istifadə etdikdən sonra onların statistikasını XRİTDX-nin Mərkəzi sisteminə göndərir. “Sendbox” üzrə bloklanma ən çox Dövlət Elektron Poçt Xidməti yönləndirilən sənədlər üzrə müəyyən olunub. Belə ki, burada 49 min 370 virus tipli elektron poçt xarakterli virus endirilərək bloklanıb, zərərsizləşdirilib.
T.Məmmədov, həmçinin diqqətə çatdırıb ki, bu ilin birinci yarısında Dövlət Elektron Poçt Xidməti üzrə 16 milyon 993 min elektron poçt emal edilib, bunun 1 milyon 416 mini və ya 8 faizi zərərverici tərkibli olması səbəbindən bloklanıb.
Emal olunan elektron poçtlardan 15 milyon 577 mininin və ya 92 faizinin istifadəçilərə çatdırıldığını vurğulayan idarə rəisi qeyd edib: “Digər illər üzrə də zərərverici tərkibli elektron poçtlar təxminən 8-10 faiz arasında dəyişir ki, bu da hər 10 elektron poçtdan birinin zərərverici tərkibli olması deməkdir. Bu, ciddi bir rəqəmdir, bu istiqamətdə qurumdaxili maarifləndirmə tədbirləri gücləndirilməlidir. Çünki ən çox kiberhücumlar elektron poçt vasitəsilə göndərilən linklərlə edilir”.
Bölmənin digər xəbərləri
