MƏŞHUR NEFTÇİ QURBAN ABBASOVUN 80 İLLİYİNƏ HƏSR OLUNMUŞ XATİRƏ MƏRASİMİ KEÇİRİLMİŞDİR
Burada keçirilən xatirə mərasimində ARDNŞ-in prezidenti Rövnəq Abdullayev, birinci vitse-prezidenti Xoşbəxt Yusifzadə, Yeni Azərbaycan Partiyası ilk təşkilatının sədri Məhəmmədəli Məmmədzadə, veteran neftçi Şahsuvar İbrahimov çıxış edərək, keçmiş SSRİ-nin və Azərbaycan SSR-in ən yüksək dövlət mükafatlarına, fəxri adlarına layiq görülmüş, ittifaq və respublika ali məclislərində xalqımızı ləyaqətlə təmsil etmiş Qurban Abbasovun şərəfli ömür yolundan, xüsusilə dənizdə neft çıxarılmasında, Neft Daşlarının tikintisindəki misilsiz xidmətlərindən danışmışlar.
Uzun illər Qurban Abbasovla birlikdə işləmiş yetirməsi, ölkəmizin neft sənayesinin tanınmış təşkilatçılarından olan Söhrab Salmanovun xatirələri qazıma fəhləsindən “Xəzərdənizneftqazsənaye” İstehsalat Birliyinin baş direktoru vəzifəsinədək yüksəlmiş bu böyük insanın işgüzarlığı, tələbkarlığı, prinsipiallığı, zəngin mənəvi dünyası barədə mərasim iştirakçılarında dolğun təəssürat yaratmışdır.
Nizami Abbasov atasının xatirəsinə göstərilən ehtirama görə şirkətin qədirbilən kollektivinə minnətdarlığını bildirmişdir.
Mərhumun ruhuna dua oxunmuşdur.
