Messi Ronaldo ilə aralarındakı rəqabəti böyük idman döyüşü adlandırıb
Bakı, 31 oktyabr, AZƏRTAC
Argentinalı hücumçu Lionel Messi və portuqaliyalı forvard Kriştianu Ronaldo arasındakı rəqabət idman səviyyəsində böyük döyüşə çevrilib.
AZƏRTAC xəbər verir ki, bu barədə Messi öz fikirlərini “L'Equipe” qəzeti ilə bölüşüb.
“Bu, idman səviyyəsində böyük döyüş idi, qarşılıqlı rəqabətimiz bizi stimullaşdırırdı, çünki biz hər ikimiz əla rəqibik və hər zaman qalib gəlmək istəyirdik. Bu, həm hər ikimiz, həm də futbolu sevən insanlar üçün çox xoş dövr idi, - deyə Messi qeyd edib. - Düşünürəm ki, biz həqiqətən də zirvəyə çatmaq və orada uzun müddət qalmağa layiq olmuşuq, çünki ona çatmaq asandır, lakin orada qalmaq daha çətindir və biz 10-15 il ərzində zirvədə olmuşuq. Bunu etmək çox çətindir, buna nail olmağımız çox təsiredicidir. Bizi izləyənlər üçün bu, çox gözəl xatirə olacaq”.
Oktyabrın 30-da Messi rekorda imza atıb və 8-ci dəfə “Qızıl top” alıb. Bu mükafat Fransanın “France Football” jurnalının versiyasına görə ilin ən yaxşı oyunçusuna verilir. Ronaldo beş dəfə “Qızıl top”a layiq görülüb.
Bölmənin digər xəbərləri
