MƏŞVƏRƏT MƏCLİSİ BEYNƏLXALQ İCTİMAİYYƏTİ ERMƏNİSTANIN TERRORÇULUĞUNA QARŞI MÜBARİZƏYƏ SƏSLƏYİR
“Dəyirmi masa” iştirakçıları, əvvəlcə, Fəxri xiyabanda olmuş, ümummilli liderimiz Heydər Əliyevin məzarı önünə tər qərənfillər düzmüşlər. Dahi rəhbərimizin ruhuna dua oxunmuşdur.
AZƏRTAC-ın müxbiri xəbər verir ki, “dəyirmi masa”da çıxış edənlər beynəlxalq terrorçuluğu qətiyyətlə pisləmiş, terrorçuluğu dövlət səviyyəsində dəstəkləyən Ermənistanın siyasətinə kəskin etirazlarını bildirmişlər.
“Dəyirmi masa” iştirakçıları adından beynəlxalq ictimaiyyətə müraciət qəbul edilmişdir. Müraciətdə deyilir ki, Siyasi Partiyaların Məşvərət Məclisi belə hesab edir ki, beynəlxalq terrorçuluğun kökünü kəsmək üçün terrorla mübarizə işində ikili standartlara son qoyulmalı, erməni terrorçu təşkilatları ilə mübarizə işi də antiterror koalisiyasının planına daxil edilməli, dünya dövlətləri Ermənistanı terrorçuluq yolundan çəkindirmək üçün qətiyyətli addımlar atmalıdır. Beynəlxalq terrorçuluğun genişlənməsinə rəvac verən erməni terror təşkilatlarının cəzasızlığı yolverilməzdir. Cəzasızlıqdan arxayınlaşan Ermənistan BMT, ATƏT, AŞ və digər nüfuzlu beynəlxalq təşkilatların qərar və qətnamələrinə məhəl qoymayaraq, terrorçuluğunu bu gün də davam etdirir, işğal etdiyi Azərbaycan ərazilərini azad etmək istəmir. Əgər bu hal bir müddət də davam edərsə, biz siyasi həmfikirlər Azərbaycan xalqını erməni terrorçuluğuna qarşı elan olunmuş açıq müharibəyə səsləyəcəyik.
Bölmənin digər xəbərləri
