Mikro və kiçik sahibkarların satış imkanları genişlənir
Bakı, 18 iyul, AZƏRTAC
Mikro və kiçik sahibkarlıq subyektlərinin istehsal etdikləri məhsulların satışına dəstək məqsədilə tədbirlər davam edir.
Kiçik və Orta Biznesin İnkişafı Agentliyindən (KOBİA) AZƏRTAC-a bildirilib ki, KOB-ların məhsullarının ticarət şəbəkələrində satışının genişləndirilməsinə dəstək mexanizmi çərçivəsində “Bolmart” marketdə mikro və kiçik sahibkarların məhsullarının satışına başlanılıb. Burada mikro və kiçik sahibkarın bal və arıçılıq məhsulları, un və un məmulatları, granola qida məhsulu, alkoqolsuz içkilər, alma sirkəsi, quru meyvə, ədviyyatlar və digər məhsulları satılır. KOB-ların iri ticarət şəbəkələrinə çıxışına və satış yerlərinin icarəsinə Kiçik və Orta Biznesin İnkişafı Agentliyi tərəfindən dəstək göstərilir. KOBİA-nın İdarə Heyətinin sədri Orxan Məmmədov “Bolmart” marketdə müvafiq stenddə məhsulların satışı ilə maraqlanıb. İndiyədək KOBİA-ya ticarət şəbəkələrinə çıxışa dəstək mexanizmindən yararlanmaq istəyən sahibkarlardan 59 müraciət daxil olub. Mexanizm çərçivəsində Agentlik tərəfindən ticarət şəbəkələrində müvafiq yerlər icarəyə götürülərək burada KOB-ların məhsullarının satışı həyata keçirilir. Digər ticarət şəbəkələri ilə də müvafiq istiqamətdə işlər aparılır, eyni zamanda, mexanizmdən yararlanmaq istəyən mikro və kiçik sahibkarlardan müraciətlərin qəbulu davam edir.
Bölmənin digər xəbərləri
