MİLANDA FACİƏ
Aprelin 18-də İtaliyanın Milan şəhərindəki ən hündür - 30 mərtəbəli binaya təyyarə dəymişdir. Milanın əsas maliyyə məhəlləsinin mərkəzində yerləşən bu bina İtaliya biznesinin rəmzi sayılır. Binanın 24-25-ci mərtəbələrində güclü yanğın baş vermişdir. Hadisənin qəza və ya terror aktı olması hələlik məlum deyildir. İtaliyanın televiziya kanalları hadisədən bir neçə dəqiqə əvvəl pilotun təyyarədə texniki nasazlıq olması barədə məlumat verdiyini bildirmişdir. Toqquşma təyyarə yerə enməzdən əvvəl manevr edərkən baş vermişdir.
İtaliya parlamentinin sədri P.Kazini demişdir ki, hadisə ilə bağlı geniş təhqiqat aparılacaq və yalnız bundan sonra rəsmi məlumat elan olunacaqdır. CNN televiziyasının verdiyi məlumata görə, 4 nəfər həlak olmuş, 20-dək adam yaralanmışdır. Xoşbəxtlikdən, hadisə iş vaxtı bitdikdən sonra baş vermişdir.
Bəzi məlumata görə, dördyerli təkmotorlu “Payper” təyyarəsi Sofiyadan, digər məlumata görə isə, Lokarnodan Romaya uçurmuş.
Bölmənin digər xəbərləri
